ඇෆ්ගනිස්ථාන සමඟ පැවැත්වීමට නියමිතව තිබූ තරග තුනකින් සමන්විත විස්සයි විස්ස තරගාවලිය කල් දැමීමට ඕස්ට්රේලියානු කණ්ඩායම තීරණය කර තිබෙනවා.
ඇෆ්ගනිස්ථානයේ කාන්තා සහ ගැහැණු ළමුන් සඳහාවන මානව හිමිකම්වල කැපී පෙනෙන පිරිහීම මෙම තීරණයට එළඹීමට හේතු වූ බවයි ඕස්ට්රේලියානු ක්රිකට් ආයතනය පැවසුවේ.
ඕස්ට්රේලියාව එළඹෙන අගෝස්තු මාසයේ දී මධ්යස්ථ ස්ථානයක දී ඇෆ්ගනිස්ථානයට එරෙහිව තරඟ තුනකින් සමන්විත විස්සයි විස්ස තරගාවලියකට එක්වීමටයි සැකසුම්කර තිබුණේ.
මේ අතර 2021 වසරේ දී දෙරට අතර පළමු ටෙස්ට් තරඟය සහ 2023 මාර්තු මාසයේදී එක්දින තරඟාවලියක් ද සැලසුම්කර තිබූ නමුත් ඕස්ට්රේලියාව එම තරඟාවලිය කල් දැමීමට කටයුතු කළේ ඇෆ්ගනිස්ථානය තුළ පවතින මානව හිමිකම් ගැටළු හේතුවෙන්.
ඕස්ට්රේලියානු ක්රිකට් ආයතනය විසින් අඟහරුවාදා ප්රකාශයක් නිකුත් කරමින් කියා සිටියේ ඇෆ්ගනිස්ථානයේ කාන්තාවන් සහ ගැහැණු ළමයින් සඳහා වන මානව හිමිකම් කොන්දේසි සම්බන්ධයෙන් ඕස්ට්රේලියානු රජය සමඟ සාකච්ඡා කර ඇති බවත්, ඔවුන් සමඟ 2023 තරඟ මාලාව කල් දැමූ දා සිට කාන්තාවන්ගේ අයිතිවාසිකම්වල “සැලකිය යුතු පිරිහීමක්” සිදුවී ඇති බවට තොරතුරු ලැබී ඇති බවයි.
මේ අතර ඕස්ට්රේලියාව පසුගිය වසර දෙක තුළ ලෝක කුසලාන තරගාවලි දෙකක දී ඇෆ්ගනිස්තාන සමඟ ක්රීඩා කර ඇති අතර එය සමාජ මාධ්ය තුළ ඇෆ්ගනිස්ථාන ක්රීඩකයින්ගේ විවේචනයට ද ලක් වුණා.
