ශ්‍රී ලාංකික මහාචාර්ය මලික් පිරිස් ඇතුළු හොංකොං විශ්ව විද්‍යාලයේ වෛද්‍ය පීඨයේ පර්යේෂකයන් විසින් සිදුකරන ලද අධ්‍යයනයක් මගින් ඔමික්‍රෝන් කොවිඩ් ප්‍රභේදය මිනිසාට ආසාදනය වීමේ හැකියාව ඩෙල්ටා ප්‍රභේදයට සාපේක්ෂව 70 ගුණයකින් වේගවත් බව අනාවරණය වී තිබෙනවා.
නව කොවිඩ් ප්‍රභේදය පිළිබඳව සිදුකළ පළමු පර්යේෂණයේ තොරතුරු එළිදක්වමින් විද්‍යාඥයින් මේ බව සඳහන් කර සිටියා.
පර්යේෂකයින් සඳහන් කරන්නේ ඩෙල්ටා ප්‍රභේදයට සාපේක්ෂව ඔමික්‍රෝන් කොවිඩ් ප්‍රභේදය මිනිස් සිරුරේ පෙනහළු කරා වාතය රැගෙන යන ශ්වසන මාර්ගය තුලදී වේගයෙන් ආසාදනය වී එය වේගයෙන් සම්ප්‍රේෂණය බවයි.
මේ හේතුවෙන් වැඩි සම්ප්‍රේෂණ හැකියාවක් පැවති ඩෙල්ටා කොවිඩ් ප්‍රභේදයට සාපේක්ෂව ඔමික්‍රෝන් ප්‍රභේදයේ වේගවත් වීමට හේතුවී ඇති බවයි හොංකොං විශ්ව විද්‍යාලයේ වෛද්‍ය පීඨයේ පර්යේෂකයන් සඳහන් කරන්නේ.
කෙසේ වුවත් ඔමික්‍රෝන් ප්‍රභේදය මිට පෙර වාර්තා වූ ප්‍රභේදයන්ට සාපේක්ෂව ආසාදිතයින්ගේ පෙනහළු වලට එල්ල කරනු ලබන බලපෑම අවම වීම හේතුවෙන් රෝගීන්ට ඇතිවන රෝග තත්ත්වයන් එතරම් බරපතල නොවන බවයි පළමු අවස්ථාවේදී සිදුකළ පර්යේෂණයෙන් කරුණු අනාවරණය වී ඇත්තේ.
