නීතිවිරෝධී පිරමීඩ ආයෝජන ක්රමයක් පවත්වාගෙන යාමේ සිද්ධියක් සම්බන්ධයෙන් අත්අඩංගුවට ගනු ලැබූ ඔන් මැක්ස් සමාගමේ අධ්යක්ෂවරු පස්දෙනා ලබන 16 වනදා දක්වා රක්ෂිත බන්ධනාගාරගත කරන ලෙස කොළඹ ප්රධාන මහේස්ත්රාත් අධිකරණය නියම කළා.
මෙම අවස්ථාවේදී සැකකරුවන් ඇප මත මුදා හරිනු ලැබුවහොත්; යුක්තිය ඉටු කිරීමේ ක්රියාවලියට අන්යාකාරයෙන් බලපෑමක් සිදුවිය හැකි බැවින් සැකකරුවන්ගේ ඇප ඉල්ලීම ප්රතික්ෂේප කරන බවත් කොළඹ ප්රධාන මහේස්ත්රාත් ප්රසන්න අල්විස් සඳහන් කළා.
ඒ අනුව අදාළ සැකකරුවන් ලබන 16 දා දක්වා රක්ෂිත බන්ධනාගාරගත කරන බවයි මහේස්ත්රාත්වරයා දැනුම්දුන්නේ.
එමෙන්ම සැකකරුවන්ගේ විදේශ ගමන් බලපත්ර අධිකරණයට භාරදෙන ලෙසත් එම නියෝගයේ සඳහන් වුණා.
විමර්ශන සිදු කරන අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි ජ්යේෂ්ඨ රජයේ නීතිඥ ඔස්වල්ඞ් පෙරේරා අධිකරණය හමුවේ කරුණු දක්වමින් මෙම සැකකරුවන් පස්දෙනා ඔන් මැක්ස් සමාගමේ අධ්යක්ෂවරු හා කොටස්කරුවන් වශයෙන් කටයුතු කරන බව සඳහන් කළා.
මහජනතාවගෙන් ආයෝජන භාරගෙන මාස 15 ක කාලයකින් පසුව තුන් ගුණයක මුදලක් ගෙවන බව පවසා අදාළ සමාගම විසින් මෙම ව්යාපාරය පවත්වාගෙන ගොස් ඇති බවත් එය මුදල් විශුද්ධිකරණය වැළැක්වීමේ පනත සහ බැංකු පනත යටතේ නීතිවිරෝධී ක්රියාවක් බවත් ජ්යෙෂ්ඨ රජයේ නීතිඥවරයා පෙන්වාදුන්නා.
මෙයාකාරයෙන් රුපියල් මිලියන 429කට අධික මුදලක් මහජනතාවගෙන් තැන්පතු වශයෙන් ලබළ්ගන තිබෙන බවත් අදාළ සමාගම සතු රුපියල් මිලියන 558ක මුදල් මේ වන විට තහනමට ගෙන තිබෙන බවත් රජයේ නීතිඥවරයා සඳහන් කළා.
මෙම ආයෝජන ජාලය තුළ මේ වනවිට තැන්පත්කරුවන් 2 19,000කට ආසන්න ප්රමාණයක් සිටින අතර; මෙම ආයෝජනවල මුදල් යෙදවූ වලස්මුල්ල, වීරකැටිය සහ දෙහිවල ප්රදේශවල පුද්ගලයින් තුන්දෙනෙකු මේ වන විටත් සියදිවි නසාගෙන තිබෙන බවත් ඔහු අධිකරණය හමුවේ පැවසුවා.
මෙලෙස මහජනතාවගෙන් ලබාගන්නා තැන්පතු මුදල් මෙම සැකකරුවන් විසින් තම පුද්ගලික ව්යාපාරික කටයුතුවල ආයෝජනය කර තිබෙන බව ද විමර්ශනවල දී තොරතුරු අනාවරණය වී ඇතැයි ද රජයේ නීතිඥවරයා සඳහන් කළා.
මෙම අවස්ථාවේදී සැකකරුවන්ට ඇප ලබා දුන්නොත් විමර්ශන කටයුතුවලට බාධා සිදුවිය හැකි බැවින් සැකකරුවන් ඇප මත මුදා හැරීම ප්රතික්ෂේප කරන ලෙසත් රජයෙන් නීතිඥවරයා අධිකරණයෙන් ඉල්ලා සිටියා.
සැකකරුවන් වෙනුවෙන් පෙනී සිටි ජනාධිපති නීතිඥ අනුජ ප්රේමරත්න අධිකරණය හමුවේ කරුණු දක්වමින් මෙය ජාත්යන්තර වශයෙන් පිළිගත් ව්යාපාරයක් බව සඳහන් කළා.
අධිකරණය විසින් මෙම ආයෝජනය ක්රමය තහනම් කරන තුරු මෙම ක්රමය තුළ කිසිදු ගැටළුවක් පැන නොනැගුණු බව සඳහන් කර සිටියා.
ජනාධිපති නීතිඥවරයා තම සේවාදායකයින් නීතිවිරෝධී ක්රියාවක නිරත වී නොමැති හෙයින් ඔවුන් ඇප මත මුදා හරින ලෙසත් ඉල්ලා සිටියා.
දෙපාර්ශ්වය විසින් ඉදිරිපත් කළ කරුණු සලකා බැලූ ප්රධාන මහේස්ත්රාත්වරයා අනතුරුව සැකකරුවන්ගේ ඇප ඉල්ලීම් ප්රතික්ෂේප කරමින් ඔවුන් රක්ෂිත බන්ධනාගාරගත කිරීමට තීන්දු කළ බවයි අප අධිකරණ වාර්තාකරු පැවසුවේ.
