ඉන්දීය විදේශ කටයුතු අමාත්ය ආචාර්ය එස්. ජයශංකර්ගේ ශ්රී ලංකා සංචාරයේ දී සිදු වූ සාකච්ඡා පිළිබඳව ඉන්දීය විදේශ කටයුතු අමාත්යාංශය මේ වනවිට නිවේදනයක් නිකුත් කර තිබෙනවා.
එම නිවේදනය මඟින් දන්වා ඇත්තේ මෙරට විදේශ කටයුතු අමාත්ය විජිත හේරත් සමඟ පැවති සාකච්ඡාවල දී කන්කසන්තුරේ වරාය නවීකරණය සඳහා ඇමරිකානු ඩොලර් මිලියන 61.5 ක ප්රදානයක් සහ ශ්රී ලංකා දුම්රිය සේවයට ඩීසල් දුම්රිය එන්ජින් 22ක් පිරිනැමීම ඇතුළුව ද්විපාර්ශ්වික සහයෝගීතාව ඉහළ නැංවීමට ඉන්දියාවේ සහාය ලබාදීමට කෙරෙහි අවධානය යොමු වූ බවයි.
ජනාධිපති අනුර දිසානායක සමඟ සාකච්ඡාවේ දී බලශක්ති, ඩිජිටල් යටිතල පහසුකම් සහ සෞඛ්ය පිළිබඳ අවදානය යොමුකර ඇති අතර, ශ්රී ලංකාවේ ආර්ථික සමෘද්ධිය සඳහා ඉන්දියාවේ සහාය අත්යවශ්ය බව ද සාකච්ඡා වී තිබෙනවා.
එමෙන්ම ඉන්දියාවට පුනර්ජනනීය බලශක්ති අපනයනය කිරීමේ හැකියාව පිළිබඳව ද ජනාධිපති අනුර කුමාර දිසානායක මෙහිදී සඳහන් කළ බවයි ඉන්දීය විදේශ කටයුතු අමාත්යාංශය නිකුත් කළ නිවේදනයේ දැක්වෙන්නේ.
ශ්රී ලංකාවේ ණය ප්රතිව්යුහගත කිරීමේ ප්රයත්නයන් සඳහා ඉන්දියාවේ සහාය ද, විදේශ කටයුතු අමාත්යවරයා ජනධිපතිවරයා සමඟ පැවති හමුවේ දී අවධාරණය කර ඇති අතර, මෙරට ආර්ථිකය ප්රකෘතිය සඳහා ඉන්දියාවේ මුල් සහ අඛණ්ඩ සහයෝගය ලබාදෙන බවට තහවුරු කර තිබෙනවා.
එමෙන්ම ඉන්දු ශ්රී ලංකා ධීවර ගැටලුව පිළිබඳව ද අවදානය යොමුව ඇති අතර, ශ්රී ලංකාවේ අත්අඩංගුවේ පසුවන ඉන්දීය ධීවරයින් ඉක්මනින් නිදහස් කිරීම සහ ජීවනෝපාය ගැටළු සඳහා මානුෂීය ප්රවේශයක් වෙනුවෙන් ද මෙහිදී සාකච්ඡා වී ඇති බව සඳහන්.
එමෙන්ම ඉන්දියාවේ සහ ශ්රී ලංකාවේ ආරක්ෂාව සම්බන්ධයෙන් ද සාකච්ඡා වී ඇති අතර, කලාපයේ ස්ථාවරත්වයට සහ ආරක්ෂාවට දෙරටේ සහයෝගීතාව පිළිබඳවත් එහිදී අවධානයට ලක්ව ඇති තවත් කරුණක්.
ජනවාර්ගික ප්රශ්නය සහ 13 වැනි සංශෝධනය සම්පූර්ණයෙන් ක්රියාත්මක කිරීම සහ පළාත් සභාව කඩිනමින් පැවැත්වීම වෙනුවෙන් පෙනී සිටින අතරම, සමානාත්මතාවය සහ යුක්තිය සඳහා දෙමළ ඇතුළු සියලුම ශ්රී ලාංකික ප්රජාවන්ගේ අභිලාෂයන් සඳහා සහාය පළ කිරීමට ද විදේශ ඇමති ආචාර්ය එස්. ජයශංකර් පවසා තිබෙනවා.
