ශ්රී ලංකාවට ආසන්න මුහුදේ දී එක්ස්ප්රස් පර්ල් නෞකාව ගිනිගෙන විනාශ වීමේ සිද්ධිය සම්බන්ධයෙන් තමන්ට එරෙහිව මහාධිකරණයේ ගොනුකර ඇති චෝදනා නීතිවිරෝධී බවට තීරණය කර නඩුව නිෂ්ප්රභ කරන්නැයි ඉල්ලා එක්ස්ප්රස් පර්ල් නෞකාවේ කපිතාන්වරයා සහ එහි දේශීය නියෝජිත සමාගම වූ සී. කොන්සෝටියම් ලංකා සමාගමේ අධ්යක්ෂවරු ගොනුකළ අභියාචනා පෙත්සම් තුනක විභාගය පංච පුද්ගල ශ්රේෂ්ඨාධිකරණ විනිසුරු මඩුල්ලක් හමුවේ ආරම්භ කෙරුණා.
ශ්රේෂ්ඨාධිකරණ විනිසුරුවරුන් වන යසන්ත කෝදාගොඩ, දිලීප් නවාස්, ශිරාන් ගුණරත්න, අචල වෙංගප්පුලි සහ ප්රියන්ත ප්රනාන්දු යන මහත්වරුන්ගෙන් සමන්විත පංච පුද්ගල ශ්රේෂ්ඨාධිකරණ විනිසුරු මඩුල්ල හමුවේ පෙත්සම අද (17) සලකා බැලුණු බවයි දසත අධිකරණ වාර්තාකරු පැවසුවේ.
එක්ස්ප්රස් පර්ල් නැවේ කපිතාන්වරයා, එහි දේශීය නියෝජිත සමාගම වූ සී. කොන්සෝටියම් ලංකා සමාගම සහ එහි අධ්යක්ෂවරු ගොනු කර ඇති මෙම පෙත්සමේ වගඋත්තරකරු වශයෙන් නීතීපතිවරයා නම්කර තිබෙනවා.
එක්ස්ප්රස් පර්ල් නෞකාව ගිනි ගැනීමේ සිද්ධිය සම්බන්ධයෙන් සමුද්ර දූෂණ වැළැක්වීමේ පනත යටතේ එම නැවේ කපිතාන්වරයා ලෙස කටයුතු කළ රුසියානු ජාතික ටියුට් කාලෝ විටැලි ඇතුළු අටදෙනකු විත්තිකරුවන් කරමින් නීතීපතිවරයා කොළඹ මහාධිකරණයේ නඩු පවරා ඇතැයි පෙත්සම්කරුවෝ සඳහන් කළා.
එම නඩුව විභාගයට ගත නොහැකි බවට විත්තිය ඉදිරිපත් කළ මූලික විරෝධතා මහාධිකරණ විනිසුරුවරයා ප්රතික්ෂේප කිරීම නිසා මහාධිකරණ නියෝගය ප්රතිශෝධනය කරන්නැයි ඉල්ලා අභියාචනාධිකරණයට පෙත්සමක් ගොනු කළ අතර අදාළ ප්රතිශෝධන පෙත්සමට අවසර දීමට තරම් නීතිමය පදනමක් හෝ කරුණු නොමැති බවට තීරණය කරමින් වගඋත්තරකරුවන්ට නොතිසි නිකුත් නොකරම පෙත්සම නිෂ්ප්රභ කෙරුණා.
ප්රතිශෝධන පෙත්සම සම්බන්ධයෙන් අභියාචනාධිකරණයේ තීන්දුව එරෙහිව පෙත්සම්කරුවන් මෙම අභියාචනා පෙත්සම ශ්රේෂ්ඨාධිකරණයට ඉදිරිපත් කර තිබෙනවා.
