එක්දින තරගාවලියේ ජය නවසීලන්තයට

සංචාරක ශ්‍රී ලංකා කණ්ඩායම සමඟ පැවති දෙවන එක්දින තරගය ලකුණු 113කින් ජය ගැනීමට නවසීලන්ත කණ්ඩායමට අද (08) හැකියාව ලැබුණා.

මෙම ජයග්‍රහණයත් සමඟ තරග තුනකින් සමන්විත තරගාවලියේ පළමු තරග දෙක ජයගෙන තරගාවලියේ ජය කල්තියාම තමන් සතු කරගන්නට නවසීලන්ත කණ්ඩායමට හැකියාව හිමිවුණා.

අද තරගයේ ආරම්භයට වර්ෂාවෙන් බාධා එල්ලවීමත් සමඟ තරගය ආරම්භ කිරීමට පැය දෙකක් පමණ ප්‍රමාද වුණා.

ඒ, හේතුවෙන් එක් ඉනිමක් පන්දුවාර 37කට සීමා වූ අතර, ශ්‍රී ලංකා ආරාධනයෙන් තරගයේ පළමුව පන්දුවට පහර දුන් නවසීලන්තය කඩුලු 09ක් දැවී ලකුණු 255ක් සිය ලකුණු පුවරුවට එක් කළා.

අනතුරුව ලකුණු 256ක ඉලක්කයක් හඹා යාමට ශ්‍රී ලංකා පිතිකරුවන් පිටියට පිවිසි අතර, මෙම තරගයේදීත් ඔවුන්ගේ වගකීම් විරහිත දියාරු පිතිකරණය කැපී පෙනුනා.

ශ්‍රී ලංකා ඉනිම වෙනුවෙන් සාර්ථකවීමට හැකිවූ එකම පිතිකරුවා බවට පත්වීමට කමිඳු මෙන්ඩිස්ට හැකියාව ලැබුණු අතර, ඔහු ලකුණු 64ක් රැස් කළා.

ජනිත් ලියනගේ ලකුණු 22ක් රැස්කළ අතර, චමිඳු වික්‍රමරත්න ලකුණු 17ක් ශ්‍රී ලංකා ලකුණු පුවරුවට එක් කළා.

අවසානයේ පන්දුවාර 30යි පන්දු 02ක් තුළ ශ්‍රී ලංකා පිතිකරුවන් සියලුදෙනා ලකුණු 142කට සීමා වුණා.

පන්දු යැවීමේ දී විල් ඕරූක් කඩුලු 03ක් සහ ජෙකොබ් ඩෆී කඩුලු 02ක් බිඳ දැමුවා.

ඒ, අනුව දෙරට අතර පැවති දෙවන එක්දින තරගය ලකුණු 113කින් ජයගැනීමට නවසීලන්ත කණ්ඩායම හැකියාව ලැබුණා.