ලබන 10 වනදා ආරම්භ වන අපොස උසස් පෙළ විභාගයට මුහුණ දෙන සිසුන්ගේ ගමන් පහසුව සඳහා දිවයින පුරා සිසු සැරිය බස් රථ සේවාව යොදවා ඇති බව ජාතික ගමනා ගමන කොමිෂන් සභාව පවසනවා.
ජාතික ගමනා ගමන කොමිෂන් සභාවේ අධ්‍යක්ෂ ජෙනරාල් ආචාර්ය නිලාන් මිරැන්ඩා සඳහන් කළේ, උසස් පෙළ විභාගය පැවැත්වෙන කාල සීමාව තුළ උදෑසන සහ පස්වරුවේ මෙම බස් රථ ධාවනය කෙරෙන බවයි.
ඒ, අනුව වෙනදා උදෑසන සිසු සැරිය බස් රථ සේවාව ආරම්භ කරන වේලාවටම විභාග කාල සීමාව තුළ ද බස් රථය ධාවනය කරන බවයි අධ්‍යක්ෂ ජෙනරාල්වරයා අද (06) මධ්‍ය හමුවක් පවත්වමින් පැවසුවේ.
මේ අතර විභාගය පැවැත්වෙන කාලය තුළ දී සිසු සැරිය බස් රථ මඟින් විභාගයට පෙනී සිටින සිසු දරුවන්ට අමතරව ඔවුන්ගේ දෙමව්පියන්ට ද ගමන් පහසුව සලසා ගැනීමට අවස්ථාව ලබාදෙන බව ද ඔහු වැඩිදුරටත් අදහස් දවමින් පැවසුවා.
