උසස් පෙළ විභාගය අනිද්දා – විභාග වංචාවන්ට සම්බන්ධ කටයුතු නම් කරන්න එපා !

2026 අධ්‍යන පොදු සහතික පත්‍ර උසස් පෙළ විභාගය අනිද්දා (10) ආරම්භවීමට නියමිතව තිබෙනවා.

මේ සම්බන්ධයෙන් දැනුම්වත් කිරීමේ විශේෂ ප්‍රවෘත්ති සාකච්ඡාවක් විභාග කොමසාරිස් ජනරාල් ඉන්දිකා කුමාරි ලියනගේ ප්‍රධානත්වයෙන් අද (08) පෙරවරුවේ පැවැත් වුණා.

මෙවර උසස් පෙළ විභාගය සඳහා පාසල් අයදුම්කරුවන් 264,496 දෙනෙකු සහ පෞද්ගලික අයදුම්කරුවන් 107,814 දෙනෙකු පෙනී සිටින බවයි ඇය පැවසුවේ.

එමෙන්ම මෙවර උසස් පෙළ විභාගය දිවයින පුරා විභාග මධ්‍යස්ථාන 2,532 කදී පැවැත් වෙන බවයි විභාග කොමසාරිස් ජනරාල්වරිය සඳහන් කළේ.

මෙහිදී විභාග කොමසාරිස් ජනරාල්වරිය සියලුම විභාග අපේක්ෂකයින්ට දැනුම් දුන්නේ විභාග නීති රීතිවලට අනුව විභාග ශාලාව තුළ දී හැසිරිය යුතු බවයි.

එමෙන්ම විභාග ආරම්භයට පැයකට පෙර තමන්ට නියමිතව ඇති විභාග මධ්‍යස්ථානය වෙත පැමිණෙන ලෙසත් ඇය උසස් පෙළ විභාග අපේක්ෂකයින්ට දැනුම් දුන්නා.

මේ අතර විභාග අපේක්ෂකයින්ට තහනම් කර ඇති දේවල් විභාගය පැවැත්වෙන කාලයතුළ දී සන්තකයේ තබාගැනීමට වරදක් බවත්, ජංගම දුරකථන, බ්ලූටූත් උපකරණ, ස්මාර්ට් ඔරලෝසු, සටහන් පත් වැනි තහනම් දෑ ළඟ තබාගෙන වරදකරුවෙක් වුවහොත් විභාග පනත යටතේ දඬුවම් ලබාදෙන බවයි අවධාරණය කළේ.

එමෙන්ම අනෙකුත් අපේක්ෂකයින්ට බාධා කිරීම්, උත්තර පත්‍ර හුවමාරු කරගැනීම, අනෙකුත් අපේක්ෂකයින් සමඟ කතා කිරීම වැනි විභාග වංචාවන්ට සම්බන්ධ කටයුතුවල නිරත නොවන ලෙසට ද සියලුම විභාග අපේක්ෂකයින්ට දැනුම් දෙනවා.