පෙම්වතියගේ හිසට කළු ගලකින් පහර දී ඝාතනය කළ සිදුවීමකට අදාළ සැකකාර පෙම්වතා අත් අඩංගුවට ගෙන තිබෙනවා.
දසත ප්‍රාදේශීය වාර්තාකරු පැවසුවේ; පෙම්වතා විසින් පෙම්වතියගේ හිසට කළු ගලකින් පහර දී ඝාතනය කර ඇති අතර ඔහු ව අද (30) පයාගල පොලිසිය අත්අඩංගුවට ගත් බවයි.
මරණකාරිණිය පයාගල, පහලගොඩ ප්‍රදේශයේ පදිංචිව සිටි දැරණියගලගේ තරුෂි සෙව්මිණි නමැති 19 හැවිරිදි තරුණියක්.
එම යුවල ඊයේ (29) රාත්‍රියේ පයාගල – දියළගොඩ ප්‍රදේශයේ මුහුදු වෙරළේ කතාබස් කරමින් සිට ඇති බවත්; දෙදෙනා අතර ඇති වූ කතාබහක් දුරදිග යාමෙන් පසු පෙම්වතා විසින් පෙම්වතියගේ හිසට ගලකින් පහර දී ඇති බවට සැකකරු විසින් පාපොච්චාරණය කළ බවයි.
එමෙන්ම සිද්ධිය වූ ස්ථානයේ තිබී හිසට පහර දුන්නා යැයි සැලකෙන කුඩා ප්‍රමාණයේ කළු ගලක් ද පොලිසිය විසින් සොයා ගනු ලැබුවා.
සිදු කරන ලද මූලික විමර්ශනවල දී අනාවරණය වී ඇත්තේ මෙම දෙපළ අතර කාලයක් තිස්සේ නිරන්තරයෙන් ආරවුල් තිබී ඇති බවයි.
සැකකරු තම මිතුරෙකුට දැනුම් දී පෙම්වතියව 1990 සුවසැරිය ගෙන්වා කළුතර නාගොඩ ශික්ෂණ රෝහලට රැගෙන ගොස් ඇති බවත් ප්‍රතිකාර ලබමින් සිටිය දී අද අළුයම
ඇය මියගොස් ඇති බවත් පොලිසිය ප්‍රකාශ කළා.
කළුතර කොට්ඨාස අපරාධ ස්ථාන පරීක්ෂණාගාර නිලධාරින් සහ පයාගල පොලිසියේ අපරාධ අංශ භාර නිලධාරීන් පරීක්ෂණ කටයුතු සිදු කරනවා.
සැකකාර පෙම්වතා 18 හැවිරිදි පයාගල, මග්ගොන ප්‍රදේශයේ පදිංචිකරුවෙක්.
ඔහුව කළුතර මහේස්ත්‍රාත් අධිකරණයට ඉදිරිපත් කිරිමට නියමිතයි.
