බන්ධනාගාර කොමසාරිස් තුෂාර උපුල්දෙණිය ජුනි මස 25 වැනි දින තෙක් තවදුරටත් රක්ෂිත බන්ධනාගාරගත කිරීමට අධිකරණය නියෝග කර තිබෙනවා.
අද (11) පස්වරුවේ වැඩ තහනමට ලක් ව සිටින බන්ධනාගාර කොමසාරිස්වරයා කොළඹ ප්රධාන මහේස්ත්රාත් තනූජා ලක්මාලි හමුවට ඉදිරිපත් කෙරුණු අතර එහිදියි මෙම නියෝගය නිකුත් කෙරුණේ.
එම සැකකරුව ඕනෑම ඇප කොන්දේසියක් යටතේ නිදහස් කරන ලෙසට ඔහු වෙනුවෙන් පෙනී සිටි ජනාධිපති නීතිඥ නලින්ද ඉන්ද්රතිස්ස මහතා අධිකරණයෙන් ඉල්ලා සිටියා.
නමුත් නීතිපතිවරයා වෙනුවෙන් පැමිණිල්ල මෙහෙය වූ අතිරේක සොලිසිටර් ජනරාල් දිලීප පීරිස් කළ කරුණු දැක්වීම් සලකා බැලූ අධිකරණ විනිසුරුවරිය සැකකරුව රක්ෂිත බන්ධනාගාරගත කිරීමට නියම කළා.
එලෙස කූඨ ලෙස අනීතිකව නිදහස් කළේ යැයි කියන අතුල තිලකරත්න නමැති සිරකරුවා මේ වනවිට රටින් පලා ගොස් ඇති බවට වාර්තා වී ඇතැයි දිලීප පීරිස් මහතා අධිකරණය හමුවේ දැනුම්දුන්නා.
එමෙන්ම මෙම සිද්ධිය සම්බන්ධයෙන් සිදු කරන විමර්ශන මේ දක්වා අවසන් වී නොමැති බවත්, වසර ගණනක් තිස්සේ සිදු කෙරුණු වංචාවක් දින කිහිපයක් ඇතුළත් සිදු කර අවසන් කළ නොහැකි බව පෙන්වාදුන් අතිරේක සොලිසිටර් ජනරාල්වරයා පැවසුවේ, ලංකාවේ අපරාධකරුවන් ඉතාමත් සූක්ෂ්ම බැවින් මෙම විමර්ශන අවසන් කිරීමට අවම සති දෙකක කාලයක් ගත වනු ඇති බවටත් පෙන්වා දුන්නා.
ඊළඟ නඩු වාරයේ දී මෙකී විමර්ශන ගැන අධිකරණය පවා විස්මයට පත්වන ආකාරයේ කරුණු ඉදිරිපත් කිරීමට තමන් පියවර ගන්නා බව වගකීමෙන් සඳහන් කරන බව ද අතිරේක සොලිසිටර් ජනරාල් ජනාධිපති නීතිඥ දිලීප පීරිස් මහතා වැඩිදුරටත් කියා සිටියා.
ජුනි මස 09 වැනි දින අපරාධ පරීක්ෂණ දෙපාර්තමේන්තුව විසින් සැකකාර උපුල්දෙණිය අත්අඩංගුවට ගෙන ඊයේ (10) කොළඹ අතිරේක මහේස්ත්රාත් මංජුල රත්නායක මහතා හමුවට ඉදිරිපත් කෙරුණා.
එහිදී සැකකරුව අද දින තෙක් රක්ෂිත බන්ධනාගාරගත කිරීමට නියෝග කෙරුණු අතර සැකකරුව කොළඹ ප්රධාන මහේස්ත්රාත්වරිය හමුවටත් පමුණුවන ලෙසට ද නියෝග කළා.
