ඊශ්‍රායල සොල්දාදුවෙකු විසින් දකුණු ලෙබනනයේ දී ජේසුස් ක්‍රිස්තුස් වහන්සේගේ ප්‍රතිමාවකට මිටියකින් පහරදීමේ සිද්ධිය ඊශ්‍රායල අගමැති බෙන්ජමින් නෙතන්යාහු දැඩි ලෙස හෙළා දැක තිබෙනවා.
අග්‍රාමාත්‍යවරයා පවසන්නේ අදාළ සිදුවීම පිළිබඳව හමුදා බලධාරීන් අපරාධ පරීක්ෂණයක් පවත්වන බවත්, වරදකරුට එරෙහිව සුදුසු දැඩි විනය ක්‍රියාමාර්ග ගන්නා බවයි.
එක්ස් සමාජ මාධ්‍ය ජාලයේ සටහනක් තබමින් නෙතන්යාහු පවසන්නේ තමා සහ ඊශ්‍රායල ජාතිකයන්ගෙන් අති බහුතරයක් සිද්ධිය ගැන අසා විස්මයට පත් වූ අතර කණගාටුවට පත් වූ බවයි.
ඊශ්‍රායල සොල්දාදුවෙකු ජේසුස් ක්‍රිස්තුස් වහන්සේගේ ප්‍රතිමාවකට මිටියකින් පහර දෙන ආකාරය දැක්වෙන රූපයක් අන්තර්ජාලයේ සංසරණය වීමත් සමඟ ඒ පිළිබඳව ලෝකයේ දැඩි ලෙස කතාබහට සහ එම ක්‍රියාවට දැඩි විරෝධයක් මතුව තිබෙනවා.
