එක්සත් ජාතික පක්ෂයේ නව නිලධාරී මණ්ඩලය වැඩ භාර ගැනීමෙන් පසු එහි පළමු කෘත්‍යාධිකාරී මණ්ඩල හමුව ඉදිරි සති දෙක තුළ රැස්වීමට නියමිතයි.
ඒ, ඉදිරි වැඩපිළිවෙල සහ ප්‍රතිපත්ති සැලසුම් සම්පාදනය සඳහායි.
ඊයේ සිරිකොත පක්ෂ මූලස්ථානයේදී එක්සත් ජාතික පක්ෂ නායක රනිල් වික්‍රමසිංහ, මහලේකම් පාලිත රංගේ බණ්ඩාර, සභාපති වජිර අබේවර්ධන, නියෝජ්‍ය නායක රුවන් විජේවර්ධන, උප නායක අකිල විරාජ් කාරියවසම්, භාණ්ඩාගාරික එම්.එස්.එම්. මිස්බා සිය ධුරවල වැඩ භාරගත්තා.
මෙම අවස්ථාවට එම පක්ෂයේ ජ්‍යෙෂ්ඨයන් වන ගාමිණී ජයවික්‍රම පෙරේරා, දයා ගමගේ, සාගල රත්නායක, නවීන් දිසානායක, අර්ජුණ රණතුංග ඇතුළු ජ්‍යෙෂ්ඨයින් පිරිසක් සහභාගි නොවූ බවට ද වාර්තා වුණා.
කෙසේ වෙතත්, පක්ෂයේ ජ්‍යෙෂ්ඨයෙකු හිරු ප්‍රවෘත්ති අංශය සිදුකළ විමසීමකදී සදහන් කළේ ඔවුන් නොපැමිණියේ පවතින සෞඛ්‍ය වාතාවරණය මත බවයි.
එමෙන්ම, පසුගිය මහ මැතිවරණයේදී එක්සත් ජාතික පක්ෂයට හිමි වූ ජාතික ලැයිස්තු මන්ත්‍රී ධුරය සඳහා නම් කිරීම ඉදිරි කෘත්‍යාධිකාරී මණ්ඩල හමුවේදී සිදුවනු ඇති බව එම පක්ෂයේ නව මහලේකම් පාලිත රංගේ බණ්ඩාර අප කළ විමසීමකදී කියා සිටියා.
මේ අතර, ආණ්ඩු විරෝධී රැල්ලක් ගොඩනැගීමට සැවොම එක් වේදිකාවකට ආ යුතු බවත් ඒ සඳහා එක්සත් ජාතික පක්ෂයට සහ ජනතා විමුක්ති පෙරමුණට ආරාධනා කරන බවත් සමගි ජන බලවේගයේ ජාතික සංවිධායක පාර්ලිමේන්තු මන්ත්‍රී තිස්ස අත්තනායක ප්‍රකාශ කළා.
මහනුවර – පල්ලෙකැළේ ප්‍රදේශයේදී ඊයේ මාධ්‍ය වෙත අදහස් දක්වමිනුයි ඔහු මේ බව කියා සිටියේ.
