කළුතර – නාගොඩ ගල්ලස්ස ප්‍රාථමික විද්‍යාලයේ පංති කාමර තුනක් බිඳ එහි තිබූ රූපවාහිනි යන්ත්‍ර කිහිපයක් සොරාගත සිද්ධියට එම පාසලේ මුරකරු අත්අඩංගුවට ගෙන තිබෙනවා.
අදාළ ප්‍රාථමික විද්‍යාලයේ විදුහල්පතිනිය දකුණ පොලිසියට ඊයේ (10) දිනයේ සිදුකර තිබූ පැමිණිල්ලකට අනුව සිදුකළ විමර්ශනවලින් පසුවයි සැකකරුව අත්අඩංගුවට ගෙන ඇත්තේ .
ඊයේ (10) උදෑසන පාසල ආරම්භ වීමට පෙර එම පාසලේ පංති කාමර 03ක් ඉතා සූක්ෂම ලෙස කඩා ඇතුළු වී ඇති බවට පාසලේ ගුරුවරුන්ට නිරීක්ෂණය වීමත් සමඟ ඒ පිළිබඳව විදුහල්පතිවරියට මේ බව දැන්වීමට කටයුතු කර තිබෙනවා.
එහිදී අනාවරණය වී ඇත්තේ පාසලේ පංති කාමරවල දරුවන්ගේ අධ්‍යාපනය සඳහා භාවිත කෙරුණු ලක්ෂ දෙකකට ආසන්න වටිනාකමකින් යුත් රූපවාහිනී යන්ත්‍ර තුනක් සොරාගෙන ඇති බවයි.
කළුතර දකුණ පොලිසිය මෙම සොරකම සම්බන්ධයෙන් සිදුකළ විමර්ශනයක දී එම පාසලේ සේවයකරන මුරකරුගේ කළුතර දකුණ ප්‍රදේශයේ පිහිටි නිවසේ තිබී ත්‍රීවිල් රථයක සඟවා තිබූ මෙම රූපවාහිනි යන්ත්‍ර තුන සොයාගැනීමට හැකිව තිබෙනවා.
එම රූපවාහිනී යන්ත්‍ර වෙනත් පුද්ගලයකුට අලෙවි කිරීමට සූදානම් කර තිබූ බවයි සැකකරු අනාවරණය කර ඇත්තේ.
අත්අඩංගුවට ගත මුරකරු අද (11) දින කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
