ඉරානය විසින් ඊශ්‍රායලට ඊයේ (14) රාත්‍රියේත් මිසයිල ප්‍රහාර එල්ල කර තිබෙනවා.
මෙම ප්‍රහාරවලින් හයදෙනෙකු මිය ගොස් තවත් දුසිම් ගණනක් තුවාල ලබා ඇති බවයි ඊශ්‍රායල මාධ්‍ය සහ හදිසි සේවා ප්‍රකාශ කළේ.
ඉරානය, ඊශ්‍රායලයේ Bat Yam ප්‍රදේශයට එල්ල කළ ප්‍රහාරයකින් එක් ශ්‍රී ලාංකික කාන්තාවකට සුළු තුවාල සිදු වී ඇති බව වාර්තා වනවා.
ඇයගේ තතත්ත්වය බරපතල නොවන බවයි තොරතුරු වාර්තා වන්නේ.
මේ අතර ඊශ්‍රායලය ඉරානයේ මිසයිල ප්‍රහාරයකට මුහුණ දෙන අතරතුර ඊශ්‍රායල අගමැති බෙන්ජමින් නෙතන්යාහු ඔහුගේ ආරක්ෂක කැබිනට් මණ්ඩලය හදිසියේ කැඳවා තිබෙනවා.
විදෙස් මාධ්‍ය වාර්තා කරන්නේ මොහොතින් මොහොත උත්සන්නවන ඉරාන – ඊශ්‍රායල ගැටුම් මැද සිය ගුවන් කලාප වසා දැමීමට සිරියාව සහ ජෝර්දානය මේ වනවිට කටයුතු කර තිබෙනවා.
සිරියානු සිවිල් ගුවන් සේවා අධිකාරිය පවසන්නේ එරට වේලාවෙන් ඉරිදා උදෑසන 08 දක්වා ගුවන් කලාපය වසා දමන බවයි.
එමෙන්ම ජෝර්දානය සඳහන් කළේ නැවත දැනුම්දෙන තුරු තම ගුවන් කලාපය වසා දමන බවයි.
මේ අතර ඊශ්‍රායල හමුදා විසින් සිදුකරන ලද ප්‍රහාරවලින් පසුව ඉරානයේ ටෙහෙරානයේ වයඹ දෙසින් පිහිටි ෂහ්රාන් තෙල් ගබඩාව ගිනි ගෙන ඇති බවයි විදෙස් මාධ්‍ය වැඩිදුරටත් තොරතුරු වාර්තා කරනවා.
