ඉරට ළං වෙන ඉන්දියාව

ඉන්දියාවේ අභ්‍යවකාශ ඒජන්සිය යුරෝපීය Proba-3 මෙහෙයුම අතිසාර්ථක දියත් කර තිබෙනවා.

විදෙස් මාධ්‍ය වාර්තා කළේ; මෙය ඉන්දීය අභ්‍යවකාශ තාක්ෂණයේ සන්ධිස්ථානයක් වන බවටයි.

ඉන්දියාවේ PSLV-C59 යුරෝපීය අභ්‍යවකාශ ඒජන්සියේ (ESA) Proba-3 මෙහෙයුම සාර්ථකව දියත් කර ඇති බවත්; මෙම මෙහෙයුම චන්ද්‍රිකා දෙකකින් සමන්විත බවත් වාර්තා වනවා.

එනම් Coronagraph Spacecraft (CSC) සහ Occulter Spacecraft (OSC), නිරවද්‍ය ලෙස පියාසර කිරීම ප්‍රදර්ශනය කිරීම සඳහා ඉතා ඉලිප්සාකාර කක්ෂයකට මෙම යානා යොදවා තිබෙනවා.

මෙය ජාත්‍යන්තර අභ්‍යවකාශ සහයෝගීතාවයේ ද වැදගත් සන්ධිස්ථානයක් සනිටුහන් කරනු ඇති බවයි වාර්තා වන්නේ.

මෙම චන්ද්‍රිකා දෙක අතර වෙන්වීමේ පරතරය මීටර් 150ක් පමණ වන බව ද පැවසෙනවා.

අදාළ චන්ද්‍රිකා දෙක එක්ව කෘත්‍රීම සූර්‍යයග්‍රහණයක් නිර්මාණය කරන අතර එය අභ්‍යවකාශ විද්‍යාවේ අද්විතීය සිදුවීමක් ලෙසත් සැලකෙනවා.

දීර්ඝ කාලයක් සඳහා සූර්යයාගේ කිරීටය අධ්‍යයනය කිරීම මෙහි අරමුණයි.

සූර්යයාගේ කිරීටකයේ අධික උෂ්ණත්වය සහ සූර්ය සුළඟේ ත්වරණය වැනි සංසිද්ධි පිළිබඳ ව මෙමගින් පරීක්ෂණ සිදු කෙරෙනු ඇති.

ශ්‍රීහාරිකෝටා හි සතිෂ් ධවාන් අභ්‍යවකාශ මධ්‍යස්ථානයෙන් මෙම චන්ද්‍රිකා දියත් කිරීමත් සමඟ මෙම මෙහෙයුම නිව්ස්පේස් ඉන්දියා ලිමිටඩ් (එන්එස්අයිඑල්) විසින් කළමනාකරණය කරනු ලැබුවා.