ඉන්ධන ලබා ගැනීම සඳහා අද (21) උදෑසන වනවිටත් මහජනතාව පෝලිම්වල රැඳී සිටින බව අප වාර්තාකරුවන් සඳහන් කළා.
මේ අතර අද (21) දිනයේ දී තවත් ඩීසල් සහ පෙට්‍රල් තොගයක් ගොඩබෑම ආරම්භ කිරීමට නියමිත බව බලශක්ති අමාත්‍ය කංචන විජේසේකර සිය ට්විටර් ගිණුමේ සටහනක් තබමින් සඳහන් කර සිටියා.
ඊයේ (20) පෙරවරුවේ සිට දිවයින පුරා ඇති ඉන්ධන පිරවුම්හල් සඳහා පෙට්‍රල් අඛණ්ඩව සපයන බවයි ඔහු වැඩි දුරටත් සඳහා කළේ.
මේ අතර ගෑස් සඳහා මිල සූත්‍රයක් හදුන්වා දීමේ අවශ්‍යතාව ඊයේ (20) කෝප් කමිටුවේ දී සාකච්ඡා වී තිබෙනවා.
ලෝක වෙළදපොලේ ගෑස් මිල ඉහළ යන විට මෙරට ගෑස් මිල ඉහළ දැමුව ද ලෝක වෙළදපොලේ එම මිල අඩුවීමේදී එහි වාසිය පාරිභෝගියාට නො ලැබෙන බැවින් මෙලෙස මිල සූත්‍රයක් හදුන්වාදීම උචිත බවයි එහිදී වැඩිදුරටත් සාකච්ඡා වී ඇත්තේ.
එමෙන්ම දෛනිකව බෙදන ගෑස් සිලින්ඩරවලින් 60%ක් අධික ජනගනත්වයක් පවතින සහ විකල්ප බලශක්ති ප්‍රභවයන් සීමා සහිත කොළඹ සහ ගම්පහ දිස්ත්‍රික්කවලට බෙදාහැරීමට කටයුතු කරන ලෙසට කෝප් කමිටුව ලිට්රෝ සමාගමට ඊයේ නිර්දේශ කළා.
ලිට්රෝ සමාගමේ ඉහළ කළමනාකාරීත්වය ඊයේ (20) පාර්ලිමේන්තු පොදු ව්‍යාපාර පිළිබඳ කාරක සභාව හෙවත් කෝප් කමිටුව හමුවට කැඳවා තිබුණේ පවතින ගෑස් හිඟය සහ ඊට අදාළ විසඳුම් පිළිබඳව විමර්ශනය සඳහායි.
