දිවයින පුරා ඉන්ධන බෙදාහැරීම කඩිනම් හා විධිමත් කරන ලෙස ජනාධිපති රනිල් වික්‍රමසිංහ බලධාරීන්ට උපදෙස් ලබාදී තිබෙනවා.
එමෙන්ම ඉන්ධන ජාවාරමේ නිරත පිරිස් සඳහා නීතිය දැඩිව ක්‍රියාත්මක කිරීමට ජනාධිපතිවරයා පොලීසියට දන්වා ඇති බවයි ජනාධිපති මාධ්‍ය අංශය සඳහන් කළේ.
මේ අතර පාසල් බස් රථ හා වෑන් රථ සඳහා අද (23) පස්වරු 3.00 සිට ලංගම ඩිපෝ හරහා ඉන්ධන බෙදාහැරීමට ද ජනාධිපතිවරයා විසින් උපදෙස් දී තිබෙනවා.
ඉන්ධන ගැටලුව සහ එහි ඉදිරි පියවර පිළිබඳ අද (23) පෙරවරුවේ අග්‍රාමාත්‍ය කාර්යාලයේ දී පැවති සාකච්ඡාවේ දී ජනාධිපතිවරයා මෙම උපදෙස් ලබා දුන්නා.
හඳුන්වාදුන් QR කේත ක්‍රමය කඩිනමින් ක්‍රියාත්මක කිරීම කෙරෙහි ද සාකච්ඡා වූ අතර, ඉදිරි ඉන්ධන මිලදී ගැනීමේ කටයුතු සහ ඊට අවශ්‍ය මුදල් සපයා ගැනීම පිළිබඳ ජනාධිපතිවරයා සහ මුදල් අමාත්‍යාංශයේ හා රාජ්‍ය බැංකු නිලධාරීන් අතර දීර්ඝ ලෙස මෙහිදී සාකච්ඡා කෙරුණා.
