යාපනයේ නෙල්ලිඅඩි ප්‍රදේශයේ පිහිටි ඉන්ධන පිරවුම්හලක සේවය කරමින් සිටි පුද්ගලයෙකුට බීමතින් පැමිණි පුද්ගලයෙකු තියුණු ආයුධයකින් පහර දී බරපතළ තුවාල සිදු කර තිබෙනවා.
අප ප්‍රාදේශීය වාර්තාකරු පැවසුවේ; තුවාලකරු අදාළ ඉන්ධන හලට පැමිණෙන රථ වාහනවලට ඉන්ධන ලබාදෙන්නෙකු බවයි.
මෙම පහරදීම ඊයේ (21) රාත්‍රී 11.30ට පමණ සිදු ව තිබෙනවා.
ස්කූටි වර්ගයේ යතුරුපැදියකින් පැමිණි තරුණයින් දෙදෙනකු විසින් පෙට්‍රල් ලබාදෙන ලෙස පවසා ප්ලාස්ටික් බෝතලයක් ඔහු වෙත ලබා දී ඇති බවයි පැවසෙන්නේ.
එහිදී බීමතින් සිටි එක් තරුණයෙකු ඉන්ධන සපයන්නා සමග ඇති වූ බහින්බස් වීමක ප්‍රතිඵලයක් ලෙස යතුරුපැදියේ අසුන්ගෙන සිටි සෙසු තරුණයා පැමිණ කඩුවකින් පහරපිට පහර එල්ල කරගෙන ගොස් තිබෙනවා.
මෙම සිදුවීම ඉන්ධන හලේ සවිකර තිබූ ආරක්ෂිත කැමරා පද්ධතියේ ද සටහන් ව ඇතැයි වාර්තා වනවා.
මේ හේතුවෙන් බරපතළ තුවාල ලැබූ පුද්ගලයා පේදුරුතුඩුව මූලික රෝහලට ඇතුළත් කිරීමටයි පියවර ගෙන ඇත්තේ.
නෙල්ලිඅඩි පොලිසිය විසින් එක් සැකකරුවකු මේ වනවිට අත්අඩංගුවට ගෙන තිබෙනවා.
