ආසියානු කුසලාන එක්දින ක්‍රිකට් තරගාවලියේ සුපිරි හතර වටයේ තීරණාත්මක තරගයක් අද (10) පැවැත්වෙනවා.
පාකිස්ථානය ඉන්දියාව අතර මෙම තරගය පස්වරු 3.00ට කොළඹ ආර්.ප්‍රේමදාස ක්‍රීඩාංගණයේ දී පැවැත්වීමට නියමිතයි.
තරගාවලියේ සුපිරි 04 වටයේ ඉන්දියාව සහභාගී වන පළමු තරගය මෙය වන අතර, පාකිස්ථාන සුපිරි 04 වටයේ සහභාගී වූ පළමු තරගය බංග්ලාදේශයට එරෙහිව ජයගත්තා.
අද තරගය සඳහා වර්ෂාවෙන් බාධා එල්ල වුවහොත් අතිරේක දිනයක් ලෙස හෙට දිනය වෙන්කිරීමට කල්තියාම ආසියානු ක්‍රිකට් කවුසිලය කටයුතු කළා.
මෙම තරගය සඳහා එක්වන පාකිස්ථාන කණ්ඩායම ඊයේ දිනයේ දී නම් කිරීමට කටයුතු කළ අතර, ඒ අනුව බංග්ලාදේශය සමඟ පැවති තරගයේ ජයග්‍රාහී කණ්ඩායම ම මෙම තරගය සඳහා එක්වනවා.
මේ අතර මෙම තරගයේ දී ඉන්දීය කණ්ඩායමේ එක් වෙනස්කමක් සිදුවනු ඇති බවයි බොහෝ දෙනෙකුගේ විශ්වාසය වී ඇත්තේ.
ඒ, අනුව ඉන්දියාව අවසන් වරට සභාගී වූ නේපාලය සමඟ තරගයට ක්‍රීඩා නොකළ වේග පන්දු යවන ක්‍රීඩක ජස්ප්‍රිත් බුම්රා අද තරගය සඳහා එක්වීමට බොහෝ දුරට අවස්ථාව පවතිනවා.
ඒ, අනුව බුම්රා අද දිනයේ කණ්ඩායමට එක්වුවහොත් වේග පන්දු යවන ක්‍රීඩක මොහොමඩ් ෂාමිට අද තරගයෙන් ඉවත්වීමට සිදුවනවා.
