මෙරට මුහුදු සීමාව තුල අනවසර ධීවර කර්මාන්තයේ යෙදුණු ඉන්දීය ධීවර යාත්රා 05ක් සමග ඉන්දීය ධීවරයන් 27 දෙනෙකු නාවික හමුදා භාරයට ගෙන තිබෙනවා.
මෙරට මුහුදු සීමාව තුළ අනවසර ධීවර කටයුතු සිදු කරන ඉන්දීය ධීවර යාත්රා පලවා හැරීම සඳහා නාවික හමුදාව ඊයේ (14) සවස මන්නාරම, යාපනය, ඩෙල්ෆ්ට් හා කච්චතිව් දූපත් අසල වූ මුහුදු ප්රදේශයේ සිදුකළ විශේෂ මෙහෙයුම් මඟිනුයි මෙම පිරිස අත්අඩංගුවට ගෙන ඇත්තේ.
ඉන්දීය ධීවර යාත්රා මෙරට මුහුදු සීමාවෙන් ඔබ්බට පලවා හැරීමේ විශේෂ මෙහෙයුමට වේග ප්රහාරක යාත්රා, වෙරළබඩ මුර යාත්රා සහ කුඩා යාත්රා යොදවා තිබුණා. එහිදී, මන්නාරමට ඔබ්බෙන් වූ මෙරට මුහුදු සීමාවේ අනවසර ධීවර කටයුතු සිදු කරමින් සිටි ඉන්දීය ධීවර යාත්රා 02ක් සමඟ ඉන්දීය ධීවරයින්15 දෙනෙකු අත්අඩංගුවට ගනු ලැබුවා.
යාපනය ඩෙල්ෆ්ට් දූපතට හා කච්චතිව් දූපතට ඔබ්බෙන් වූ මෙරට මුහුදු සීමාවේ අනවසර ධීවර කටයුතු සිදු කල ඉන්දීය ධීවර යාත්රා තුනක් 03ක් සමඟ ඉන්දීය ධීවරයින් 12 දෙනෙකු අත්අඩංගුවට ගනු ලැබුවේ උතුරු නාවික විධානය මඟින්.
මෙම මෙහෙයුම් මඟින් නාවික හමුදා භාරයට ගත් ඉන්දීය ධීවර යාත්රා සහ එහි සිටි ඉන්දීය ධීවරයින් 27 දෙනා තලෙයිමන්නාරම ජැටිය සහ කන්කසන්තුරය වරාය වෙත රැගෙන ආ අතර, ඉදිරි නීතිමය කටයුතු සඳහා තලෙයිමන්නාරම සහ යාපනය ධීවර පරීක්ෂක කාර්යාල වෙත භාර දීමට නියමිතයි.
මෙම මෙහෙයුමත් සමඟ නාවික හමුදාව විසින් වසරේ මේ දක්වා සිදුකළ මෙහෙයුම් මඟින් මෙරට මුහුදු සීමාව තුල අනවසර ධීවර කටයුතු සිදුකළ ඉන්දීය ධීවර යාත්රා 22ක් සහ ඉන්දීය ධීවරයින් 137ක් නාවික හමුදා භාරයට ගෙන තිබෙනවා.
