නවදිල්ලියේ පැවති 18 වැනි BRICS සමුළුවෙන් පසු ඉන්දියාව සහ දකුණු අප්‍රිකාව අතර ආරක්ෂක හා හමුදා සහයෝගීතාව තවදුරටත් පුළුල් කිරීමට නව අවධානයක් යොමුවී තිබෙනවා.
දකුණු අප්‍රිකාවට ඉන්දියාව සමඟ සමීප ආරක්ෂක සබඳතා තුළින් ඒකාබද්ධ නිෂ්පාදනය, තාක්ෂණික කුසලතා සංවර්ධනය සහ හමුදා ධාරිතා වර්ධනය සඳහා අවස්ථා හිමිවිය හැකි බව සඳහන්.
එමෙන්ම ඉන්දියාවේ වර්ධනය වෙමින් පවතින දේශීය ආරක්ෂක කර්මාන්තය හේතුවෙන් දකුණු අප්‍රිකාව සමඟ සහයෝගීතාව පුළුල් කරමින් ඉන්දියානු ආරක්ෂක නිෂ්පාදන සහ තාක්ෂණ සඳහා නව වෙළෙඳපොළද විවෘත කරගත හැකියි.
BRICS සමුළුවට සමගාමීව ඉන්දීය අග්‍රාමාත්‍ය නරේන්ද්‍ර මෝදි සහ දකුණු අප්‍රිකානු ජනාධිපති සිරිල් රමෆෝසා හමුවී දෙරටේ උපායමාර්ගික හවුල්කාරීත්වයේ ප්‍රගතිය පිළිබඳ සාකච්ඡා කර තිබෙනවා.
බහුපාර්ශ්වික සංවිධාන තුළ සමීප සම්බන්ධීකරණය තවදුරටත් පවත්වාගෙන යාමටද ඔවුන් එකඟ වී තිබෙනවා
.
ඉන් දින කිහිපයකට පසු දෙරට අතර පළමු Army-to-Army Staff Talks සාකච්ඡා නවදිල්ලියේදී පවත්වා තිබෙනවා.
හමුදා පුහුණු හුවමාරු සහ ඒකාබද්ධ ධාරිතා සංවර්ධනය පුළුල් කිරීම එහි ප්‍රධාන අවධානය වී ඇති අතර, එය දෙරටේ හමුදා අතර සෘජු සබඳතා සඳහා නව ආයතනික මාර්ගයක් ලෙස සැලකිය හැකියි.
දකුණු අප්‍රිකානු නියෝජිත පිරිස ඉන්දීය හමුදාවේ 505 Army Base Workshop වෙතද ගොස් තිබෙනවා.
එහිදී කෘත්‍රිම බුද්ධිය භාවිතය, තාක්ෂණික නවීකරණය සහ ඉන්දියාවේ දේශීය ආරක්ෂක නිෂ්පාදන හැකියාවන් පිළිබඳ දැනුවත් කර තිබෙනවා.
