ඉන්දියාව කාන්තා විස්සයි විස්ස ලෝක කුසලානයෙන් එළියට

කාන්තා පන්දුවාර විස්සයි විස්ස ලෝක කුසලාන ක්‍රිකට් තරගාවලියෙන් ඉවතට විසිවීමට ඉන්දීය කාන්තා කණ්ඩායමට ඊයේ (23) සිදු වුණා.

ඒ, මෙවර තරගාවලියේ පළමු අවසන් පූර්ව තරගයේදී ඕස්ට්‍රේලියානු කාන්තා කණ්ඩායම ඉදිරියේ පරාජය වීමත් සමඟයි.

ඉන්දීය කණ්ඩායම පරාජය කරමින් ඕස්ට්‍රේලියානු කණ්ඩායම මෙම තරගය ජය ගත්තේ ලකුණු 05 කින්.

කාසිය වාසිය දිනූ ඕස්ට්‍රේලියානු නායිකාව දෙවරක් නොසිතාම නිවුලන්ඩ්ස් පිටියේ පළමුව පන්දුවට පහරදීමට තීරණය කළා.

එහිදී ඕස්ට්‍රේලියානු නායිකා මෙග් ලැනින්ගේ තීරණයට සාධාරණයක් ඉටු කරමින් ඕස්ට්‍රේලියානු ක්‍රීඩිකාවන් කඩුලු 04ක් දැවී පන්දුවාර 20 තුළ ලකුණු 172ක ලකුණු පුවරුවක් නිර්මාණය කළා.

අනතුරුව ලකුණු 173ක ඉලක්කයක් හඹා යාමට පිටියට පිවිසි ඉන්දීය කාන්තා කණ්ඩායමට නියමිත පන්දුවාර 20 තුළ කඩුලු 08ක් දැවී රැස්කරගත හැකි වූයේ ලකුණු 167ක් පමණයි.

ඒ, අනුව මෙම තරගයෙන් ලකුණු 05ක තියුණු ජයක් හිමිකර ගනිමින් 2023 කාන්තා පන්දුවාර විස්සයි විස්ස ලෝක කුසලාන ක්‍රිකට් තරගාවලියේ අවසන් මහා තරගයට සුදුසුකම් ලබා ගැනීමට ඕස්ට්‍රේලියානු කණ්ඩායමට හැකියාව ලැබුණා.

තරගාවලියේ දෙවන අවසන් පූර්ව තරගය එංගලන්ත කාන්තා කණ්ඩායම සහ දකුණු අප්‍රිකානු කාන්තා කණ්ඩායම අතර අද (24) පැවැත්වීමට නියමිතයි.