ඉන්දියාවේ දී අත්අඩංගුවට පත්ව පසුගිය දා මෙරටට රැගෙන ආ සංවිධානාත්මක අපරාධකරුවෙක්වන කරන්දෙණියේ සුද්දාගේ සහෝදරයා වන සෝබනාහන්දි සනත් ද සිල්වා නොහොත් ‘කරන්දෙණියේ රාජු’ නැමැත්තාගේ නිවසේ තිබී විදේශීය නිෂ්පාදිත ගිනි අවියක් සහ ජීව උණ්ඩ 13ක් සොයාගෙන තිබෙනවා.
මේ වනවිට රඳවාගෙන සිටින කරන්දෙණියේ රාජුගෙන් කරන ප්රශ්න කිරීම්වල දීයි මෙම ගිනි අවිය පිළිබඳව තොරතුරු අනාවරණය වී ඇත්තේ.
මධ්යම අපරාධ විමර්ශන ඒකකයේ ජ්යෙෂ්ඨ පොලිස් අධිකාර කමල් ආරියවංශ ඇතුළු නිලධාරි කණ්ඩායමක් මීටියාගොඩ පොලිසිය සමඟ එක්ව සිදුකළ මෙහෙයුමක දී මෙම මිලි මීටර් 09 වර්ගයේ ගිනි අවිය සහ ජීව උණ්ඩ සොයාගෙන තිබෙනවා.
මෙහිදී මේ වනවිට රඳවාගෙන සිටින කරන්දෙණියේ රාජු ද මීටියාගොඩ පොලිස් ස්ථානය වෙත රැගෙන විත් තිබූ බවයි දසත නිවුස් වාර්තාකරු සඳහන් කළේ.
ඝාතන ඇතුළු අපරාධ සිද්ධි 15කට අධික සංඛ්යාවකට පොලීසියට අවශ්යව සිටින රාජු, ඉන්දියාවේදී එරට ආරක්ෂක අංශ පසුගියදා අත්අඩංගුවට ගෙන තිබූ අතර, අනතුරුව ඉන්දියාවට ගිය මෙරට පොලිස් නිලධරීන් කණ්ඩායමක් ඔහුව පසුගිය 17 වනදා නවදිල්ලි නුවර සිට මෙරටට රැගෙන ආවා.
