දින කිහිපයකට පෙර ඉන්දීය මුදල් අමාත්‍ය නිර්මලා සීතාරාමන් ඉදිරිපත් කළ අයවැය යෝජනාවලට අනුව ප්‍රථම වරට න්‍යෂ්ටික බලාගාර පිහිටුවීමට පුද්ගලික අංශයට හවුල් වීමට අවසර දී තිබෙනවා.
ක්ෂේත්‍රයේ විශේෂඥයින් පෙන්වා දෙන්නේ මෙම අවසරය විශාල නව විවෘත කිරීමක් බවයි.
දේශගුණික විපර්යාස භයානක අනතුරක් ලෙස දකින ලෝකය, ශුන්‍ය කාබන්ඩයොක්සයිඩ් විමෝචනයකින් විදුලිය ලබාදෙන පරමාණුක ශක්තිය, එය ස්ථාපනය කිරීමේ ප්‍රාග්ධන පිරිවැය තවමත් ඉහළ මට්ටමක පැවතුණ ද, ශක්‍ය විකල්පයක් ලෙස වැඩි වැඩියෙන් සලකනු ලබනවා.
සිය අයවැය කතාවේ දී සීතාරාමන් මහත්මිය පැවසුවේ, න්‍යෂ්ටික ක්ෂේත්‍රයේ නව තාක්‍ෂණ පර්යේෂණ හා සංවර්ධනය සඳහා පුද්ගලික අංශය සමඟ හවුල් වනු ඇති බවයි.
ඉන්දියානු පරමාණුක බලශක්ති පනත අනුව පුද්ගලික අංශයට න්‍යෂ්ටික බලශක්ති උත්පාදනයට සහභාගී වීමට අවසර හිමි වූයේ නැහැ.
පුද්ගලික අංශයට හවුල් වීමට අවසර දීමත් සමග, මෙම ප්‍රාග්ධන ඉහළ බලාගාර සඳහා මූල්‍යකරණයේ නව මාවතක් විවෘත වනු ඇති.
පරමාණුක බලශක්ති නියාමන මණ්ඩලයට අනුව දැනටමත් ඉන්දියාව සතුව න්‍යෂ්ටික බලය මෙගාවොට් 6780 ක ස්ථාපිත ධාරිතාවක් තිබෙනවා.
