ඉන්දියාවේ තෙදින නිල සංචාරයක නිරත ජනාධිපති අනුර කුමාර දිසානායක සහ ඉන්දීය අග්රාමාත්ය නරේන්ද්ර මෝදි අතර සාකච්ඡාව අග්රාමාත්ය නිල නිවස වන හයිද්රාබාද් මැදුරේදී අද (16) පස්වරුවේ පැවැත් වුණා.
අනතුරුව ද්විත්ව බදුකරණය වැළැක්වීම සහ රාජ්ය නිලධාරීන්ගේ ශක්යතා වර්ධනය පිළිබඳ අවබෝධතා ගිවිසුම් ඉන්දු – ශ්රී ලංකා රාජ්ය නායකයින් ඉදිරියේ හුවමාරු කරගත්තා.
ඉන්දීය විදේශ ප්රතිපත්තිය තුළ ශ්රී ලංකාවට විශේෂ ස්ථානයක් හිමිව ඇති බව තමන් හොඳින් දන්නා බව ජනාධිපති අනුර කුමාර දිසානායක රාජ්ය නායකයින් දෙදෙනා එක් වූ ඒකාබද්ධ මාධ්ය හමුවේ දී සිහිපත් කළා.
ඉන්දීය අග්රාමාත්ය නරේන්ද්ර මෝදි මෙහිදී කියා සිටියේ, ජනාධිපති අනුර කුමාර දිසානායක පළමු විදෙස් සංචාරය සඳහා ඉන්දියාව තෝරා ගැනීම පිළිබඳ සතුටු වන බවයි.
අනාගතවාදී දැක්මකින් දෙරට අතර සබඳතාවයට නව මුහුණුවරක් දෙමින් භෞතික, ඩිජිටල් සහ බලශක්ති යන කුළුණු තුන ශක්තිමත් කිරීම සඳහා ශ්රී ලංකාවට තාක්ෂණික සහාය දැක්වීමට ද දෙරට අතර විදුලිබල ජාල සම්බන්ධතාවය සහ බහු නිෂ්පාදන ඛනිජ තෙල් නළ මාර්ගය ස්ථාපිත කිරීම සම්බන්ධයෙන් ද මෙම සාකච්ඡාවේ අවධානය යොමු වුණා.
ඉන්දීය සංවර්ධන සහයෝගීතාව ඉදිරියට ගෙන යමින් අනුරාධපුර දුම්රිය මාර්ගයේ සංඥා පද්ධතිය සහ කන්කසන්තුරේ වරාය ප්රතිසංස්කරණය කිරීම සඳහා ආධාර ලබාදීම පිළිබඳවද මෙහි දී දීර්ඝ වශයෙන් සාකච්ඡා කෙරුණා.
ඉන්දීය අධ්යාපන සහයෝගිතාව යටතේ ලබන වසරේ සිට යාපනයේ සහ නැගෙනහිර පළාතේ විශ්වවිද්යාලවල සිසුන් 200 කට මාසික ශිෂ්යත්ව පිරිනැමීමට නියමිතයි.
ඉදිරි වසර පහ තුළ ශ්රී ලංකාවේ සිවිල් සේවකයන් 1,500ක් ඉන්දියාවේදී පුහුණුව ලබාදීමට ද ඉන්දීය අග්රාමාත්යවරයා කැමැත්ත පළ කර තිබෙනවා.
එසේම නිවාස, පුනර්ජනනීය බලශක්තිය සහ යටිතල පහසුකම් සමඟ, ශ්රී ලංකාවේ කෘෂිකර්මාන්තය, කිරි කර්මාන්තය සහ ධීවර කර්මාන්තය දියුණු කිරීම සඳහා ඉන්දියාව සහයෝගීතාවයෙන් කටයුතු කරනු ඇති.
ඉන්දියාවේ ආරක්ෂාවට සහ කලාපයේ ස්ථාවරත්වයට හානි වන අයුරින් ශ්රී ලංකා භූමිය යොදා ගැනීමට කිසි විටෙකත් ඉඩ ලබා නොදෙන බව ජනාධිපති අනුර කුමාර දිසානායක ඉන්දීය අග්රාමාත්යවරයාට සහතික වී තිබෙනවා.
ආරක්ෂක සහයෝගිතාව යටතේ සමුද්ර ආරක්ෂාව, ත්රස්තවාදය පිටුදැකීම, සයිබර් ආරක්ෂාව, ජාවාරම් සහ සංවිධානාත්මක අපරාධවලට එරෙහිව සටන් කිරීම, මානුෂීය ආධාර සහ ආපදා සහන වැනි විෂයයන් සම්බන්ධයෙන් සහයෝගීතාව වැඩි දියුණු කිරීමට මෙම සාකච්ඡාවේදී අවධානය යොමුව තිබෙනවා.
ජනාධිපති අනුර කුමාර දිසානායක ඉන්දීය අග්රාමාත්ය නරේන්ද්ර මෝදිට ශ්රී ලංකාවේ සංචාරයක නිරත වන ලෙස ද ආරාධනා කර සිටියා.
මේ අතර ඉන්දීය අග්රාමාත්ය නරේන්ද්ර මෝදි විසින් ජනාධිපති අනුර කුමාර දිසානායක වෙනුවෙන් දිවා භෝජන සංග්රහයක් පවත්වනු ලැබුවා.
සුභ පැතුම් !!!!!
Suba pathum .