මෙරට ඉතාලි තානාපති කාර්යාලය ඡායාරූපගත කරමින් සිටියදී පොලිස් විශේෂ කාර්ය බළකාය මගින් අත්අඩංගුවට ගත් සැකකරුවෙකු නොවැම්බර් මස 11 දින දක්වා රක්ෂිත බන්ධනාගාර ගත කරන ලෙස කොළඹ අතිරේක මහෙස්ත්‍රාත් මංජුල රත්නායක මහතා නියෝග කළා.
කොටුගොඩ – යාගොඩමුල්ල ප්‍රදේශයේ පදිංචි 54 හැවිරිදි ටිරාන් කුෂාන් කවිරත්න නමැති සැකකරුවෙකුයි එලෙස රක්ෂිත බන්ධනාගාර ගත කෙරුණේ.
අත්අඩංගුවට ගන්නා විට සැකකාර පුද්ගලයා සතුව කොළඹ හා අවට ප්‍රදේශවල වැදගත් මර්මස්ථානවල ඡායාරූප 700ක් පමණ ඇතුළත් පොතක් තිබිය දී සොයාගෙන ඇති බව ද කුරුඳුවත්ත පොලිසිය අධිකරණයට දැනුම්දුන්නා.
ජංගම මුර සංචාරයේ නිරත පොලිස් විශේෂ කාර්ය බළකායේ නිලධාරීන් පිරිසක් ඊයේ(27) අළුයම් කාලයේ දී සැකකාර පුද්ගලයාව අත්අඩංගුවට ගෙන පරීක්ෂා කිරීමේ දී ඔහු සතුව තිබී එම රූප සටහන් පොතට අමතරව ඇතැම් ප්‍රභූවරුන් සමග ඔහු කතාබස් කළ සංවාද ඇතුළත් හඬපට අත්අඩංගුවට ගෙන ඇති බව ද පොලිසිය අධිකරණයට දැනුම්දී තිබෙනවා.
සිද්ධියෙන් පසු පොලිස් නිලධාරීන් පිරිසක් සැකකාර පුද්ගලයා පදිංචිව සිටින කොටුගොඩ යාගොඩමුල්ල නිවස වෙත ගොස් පරීක්ෂා කර ඔහුගේ බිරිඳගෙන් ප්‍රකාශ සටහන් කරගෙන ඇති බව ද පොලිසිය අධිකරණයට දැක්වූ කරුණුවලින් හෙළි වුණා.
සැකකාර පුද්ගලයා මෙම මර්මස්ථාන ඡායාරූපගත කර ඇත්තේ කුමන හේතුවක් නිසා ද එම ඡායාරූප වෙනත් පාර්ශ්වයක් අතට පත් කර තිබේ ද යන්න පිළිබඳව තවදුරටත් විමර්ශනය සිදු කරන බව ද පොලිසිය අධිකරණයට පැවසුවා.
සිය සහෝදරයකු සමග එක්ව සැකකාර පුද්ගලයා කොළඹ මැනිං මාකට්හි ව්‍යාපාර කටයුතුවල නිරතව සිට ඇති බවත් මීට මාස හයකට පමණ පෙර දී ඔහු එම කටයුතුවලින් ඉවත් කර ඇති බවට විමර්ශන නිලධාරීන් අනාවරණය කරගෙන ඇති බව ද පොලිසිය අධිකරණයට දන්වා තිබෙනවා.
පොලිසිය අධිකරණයට දැක්වූ කරුණු සැලකිල්ලටත් මහේස්ත්‍රාත්වරයා ඔහු එසේ රක්ෂිත බන්ධනාගාරගත කරන ලෙසටයි නියම කළේ.
