ඉතාලියේ පළාත් පාලන මැතිවරණයට ශ්‍රී ලාංකික කාන්තාවක්

ඉතාලියේ පළාත් පාලන මැතිවරණය සඳහා තරග කිරීමට ශ්‍රී ලාංකික කාන්තාවක් ඉදිරිපත්ව සිටිනවා.

ඒ ඉතාලියේ ලොම්බර්දි (Lombardy) පළාත නියෝජනය කරමින්.

ධම්මිකා චන්ද්‍රසේකර නම් මෙම ලාංකික කාන්තාව ලොම්බර්දි පළාතේ විදේශීය ප්‍රජාව නියෝජනය කිරීම සඳහා අපේක්ෂකත්වය ලබාගෙන ඇත්තේ partito democratico පක්ෂයෙන්.

මෙවර ඉතාලියේ පැවැත්වෙන පළාත් පාලන මැතිවරණයේදී ලොම්බර්දි පළාතේ ජීවත්වන විදේශිකයන් නියෝජනය කිරීම සඳහා වරම් ලැබූ එකම අපේක්ෂිකාවයි.

දරුවන් තුන් දෙනෙකුගේ මවක් වන 57 හැවිරිදි ධම්මිකා චන්ද්‍රසේකරගේ උපන් ගම කඳාන ප්‍රදේශයයි.

සාමාන්‍ය පෙළ විභාගය දක්වා කඳාන ශාන්ත සෙබස්තියන් මහා විද්‍යාලයෙන් ද උසස් පෙළ විභාගය කඳාන මෙසිනොඩ් විද්‍යාලයෙන් ද අධ්‍යාපනය හැදෑරූ ඇය ඉතාලියට පැමිණෙන්නේ 1984 වසරේදීයි.

මීට 38 වසරකට පෙර ඉතාලියට පැමිණෙන විට ඇයට වයස අවුරුදු 19ක්.

රෝමය, නාපොලි, වෙරෝනා, මිලානෝ නගරවල ජීවත් වෙමින් දුෂ්කර රැකියාවල නිරතව අධ්‍යාපනය හැදෑරූ ඇය සමාජ සේවා වෙනුවෙන් ද විශාල කැපවීමක් සිදුකර තිබෙනවා.

මිලානෝ නගරයේ වසර 6ක පමණ කාලයක් පුරා විදේශිකයන් වෙනුවෙන් කැපවී සිටින සමාජ සේවා ආයතනයක් වූ centro community dello sri lanka ආයතනයයි ධම්මිකා චන්ද්‍රසේකරගේ නම අපේක්ෂකත්වය සඳහා partito democratico පක්ෂය වෙත ඉදිරිපත් කර ඇත්තේ.

ජයග්‍රහණයෙන් අනතුරුව ශ්‍රී ලංකාවේ සංචාරක ක්ෂේත්‍රයට මෙන්ම ශ්‍රී ලංකාවටද සහය දැක්වීම අපේක්ෂාව බවද ඇය පැවසුවා.

ඉතාලියේ වෙසෙන ශ්‍රී ලාංකිකයින්ගේ අයිතිවාසිකම් වෙනුවෙන්ද ඉදිරියේදී තමන් පෙනි සිටින බවයි ධම්මිකා චන්ද්‍රසේකර වැඩිදුරටත් පැවසුවේ.