ඇෆ්ගනිස්ථානට ඉතිහාසගත එක්දින තරගාවලි ජයක්

ඉතිහාසයේ පළමුවරට දකුණු අප්‍රිකාවට එරෙහිව එක්දින තරගාවලිය ජයක් වාර්තා කරන්නට ඇෆ්ගනිස්ථාන කණ්ඩායමට ඊයේ (20) හැකියාව ලැබුණා.

ඒ, දෙරට අතර ඊයේ (20) පැවති දෙවන එක්දින තරගයෙන් ලකුණු 177ක දැවැන්ත ජයක් වාර්තා කිරීමත් සමඟයි.

සාජා හිදී පැවති මෙම තරගයේ පළමුව පන්දුවට පහර දුන් ඇෆ්ගනිස්ථාන කණ්ඩායම නියමිත පන්දුවාර 50 තුළ කඩුලු 04ක් දැවී 311ක ලකුණු පුවරුවක් නිර්මාණය කළා.

එහිදී ඇෆ්ගන් ඉනිමේ වැඩිම ලකුණු ලාභියා වූ රහ්මනුල්ලා ගුර්බාස් සිය 07 වන ජාත්‍යන්තර එක්දින ශතකය වාර්තා කරමින් ලකුණු 105ක් රැස් කළා.

පන්දු 110ක් තුළ ගොඩනැඟුණු ඔහුගේ ඉනිමට හයේ පහර 03ක් සහ හතරේ පහර 10ක් ඇතුළත් වුණා.

ඊට අමතරව අස්මතුල්ලාහ් ඕමර්සායි ලකුණු 83ක් සහ රහමත් ෂා අර්ධ ශතකයක් වාර්තා කරමින් ඇෆ්ගනිස්ථාන ඉනිම ගොඩනැගීමට දායක වුණා.

අනතුරුව ලකුණු 312ක ජයග්‍රාහී ඉලක්කයක් හඹා යාමට දකුණු අප්‍රිකානු පිතිකරුවන් පිටියට පිවිසි අතර ඔවුන්ට රිසි සේ ලකුණු රැස්කරන්නට රෂිඩ් ඛාන් සහ නන්ගෙයලියා කැරොටේ ඉඩ ලබාදුන්නේ නැහැ.

එහිදී ඊයේ දිනයේ සිය 26 වන දිවියට පා තැබූ රෂිඩ් ඛාන් දකුණු අප්‍රිකානු ඉනිමේ කඩුලු 05ක් බිඳ දැමූ අතර, නන්ගෙයලියා කැරොටේ කඩුලු 04ක් බිඳ දැමුවා.

ඒ, අනුව පන්දුවාර 34යි පන්දු දෙකක් තුළ දකුණු අප්‍රිකානු පිළිතුරු ඉනිම අවසන් කරන්නට ඇෆ්ගනිස්ථාන පන්දු යවන්නට හැකියාව ලැබුණා.

මෙම ජයග්‍රහණයත් සමඟ තරග තුනකින් සමන්විත එක්දින තරගාවලියේ පළමු තරග දෙක ජයගෙන තරගවලියේ ජය වාර්තා කරන්නට ඇෆ්ගනිස්ථාන ක්‍රීඩකයින් සමත් වුණා.