ඇමරිකා ජනාධිපති ජෝ බයිඩන් ඊශ්‍රායලයේ ටෙල් අවිව් වෙත පැමිණ තිබෙනවා. විදෙස් මාධ්‍ය වාර්තා සඳහන් කළේ ඊශ්‍රායල අගමැති බෙන්ජමින් නෙතන්යාහු විසින් ඔහු පිළිගනු ලැබූ බවයි.
සංචාරය අතරතුර ඇමරිකා ජනාධිපතිවරයා ඊශ්‍රායල් අගමැතිවරයා සමග සාකච්ඡා පවත්වනු ඇති.
ඔහු ඊශ්‍රායලයට එක්සත් ජනපද සහාය ලබා දෙන බවට ප්‍රතිඥා දී ඇති අතර ගාසා හි රෝහල් ප්‍රහාරය අනෙක් කණ්ඩායම විසින් සිදු කරන ලද එකක් බවට පෙනෙන බවයි ජෝ බයිඩ්න් සඳහන් කර ඇත්තේ.
ඊයේ රාත්‍රියේ ගාසා හි අල් අහ්ලි රෝහලේ පිපිරීමෙන් පසු පලස්තීන ජනාධිපති මහමුද් අබ්බාස් ඇතුළු අරාබි නායකයින් සමඟ ජනාධිපතිවරයා සැලසුම් කළ රැස්වීම දැනටමත් අවලංගු කර ඇති බව ද සඳහන්.
මේ අතර ඊශ්‍රායලය ට පැමිණි එක්සත් ජනපද ජනාධිපති ජෝ බයිඩන් සහ ඊශ්‍රායල අගමැති බෙන්ජමින් නෙතන්යාහු අතර ඒකාබද්ධ ප්‍රවෘත්ති සාකච්ඡාවක් ද මේ වන විට පැවැත්වෙනවා.
මේ අතර සටන්කාමීන් විසින් රෝහලේ පිපිරීමක් සිදු කළ බව පෙන්වන වීඩියෝ පටයක් ද ඊශ්‍රායලය නිකුත් කර තිබෙනවා.
පලස්තීන සටන්කාමීන්ගේ රොකට් ප්‍රහාරයක් හේතුවෙන් අඟහරුවාදා සවස ගාසා තීරයේ රෝහලේ පිපිරීම සිදු වූ බවට ඊශ්‍රායලය චෝදනා කරනවා.
ගාසා තීරයේ අල් අහ්ලි රෝහලේ පිපිරීම පලස්තීන ඉස්ලාමීය ජිහාඩ් (PIJ) සටන්කාමී කණ්ඩායම විසින් සිදු කළ බවයි ඊශ්‍රායල හමුදාව ප්‍රකාශ කර ඇත්තේ.
ඊශ්‍රායල ආරක්ෂක අංශය පවසන්නේ අදාළ වීඩියෝවේ තොරතුරු මගින් පෙන්නුම් කරන්නේ පලස්තීන ඉස්ලාමීය ජිහාඩ් රොකට්ටුවක් මගින් රෝහලලට පහරදුන් බවයි.
හමාස්, පලස්තීන බලධාරීන් සහ අනෙකුත් රටවල් ප්‍රහාරය සම්බන්ධයෙන් ඊශ්‍රායලයට දොස් පවරන අතර, හමාස් සංවිධානය පවසන්නේ මිනිසුන් 500ක් අදාළ ප්‍රහාරයෙන් මිය ගිය බවයි.
ඔක්තෝබර් 7 වැනිදා හමාස් ප්‍රහාරයෙන් පසු ඊශ්‍රායලය ගාසා තීරයේ ඉලක්ක වෙත ගුවන් ප්‍රහාර එල්ල කරමින් සිටිනවා.
