ඇමරිකාවේ ප්රමුඛතම කෘත්රිම බුද්ධි පර්යේෂණ ආයතනයක් වන Anthropic සමාගම, චීනයේ සුප්රසිද්ධ තාක්ෂණික සහ විද්යුත් වාණිජ්ය දැවැන්තයෙකු වන Alibaba සමූහ ව්යාපාරයට එරෙහිව බරපතළ බුද්ධිමය දේපළ සොරකම් කිරීමේ චෝදනාවක් එල්ල කර තිබෙනවා.
ඇමරිකානු සෙනෙට් මණ්ඩලයට සහ ධවල මන්දිර නිලධාරීන්ට ලිපියක් යොමු කරමින් Anthropic සමාගම පෙන්වා දෙන්නේ, චීනය තුළ භාවිත කිරීම තහනම් කර ඇති තමන්ගේ ‘Claude’ AI මාදිලිය වෙත Alibaba සමාගම නීතිවිරෝධී ලෙස ඇතුළු වී ඇති බවයි.
මෙය තමන් මුහුණ දුන් විශාලතම සහ සංවිධානාත්මක දත්ත නිස්සාරණ ප්රහාරය (Distillation Attack) බවද එම සමාගම අවධාරණය කරනවා.
ලබාගෙන ඇති දත්තවලට අනුව, Alibaba සමාගමට සම්බන්ධ ‘Qwen’ කෘත්රිම බුද්ධි රසායනාගාරයේ ක්රියාකාරීන් විසින් ව්යාජ පරිශීලක ගිණුම් 25,000කට ආසන්න ප්රමාණයක් නිර්මාණය කර තිබෙනවා.
ඔවුන් මෙම ව්යාජ ගිණුම් හරහා පසුගිය අප්රේල් 22 සිට ජුනි 05 දක්වා කාලය තුළ Claude පද්ධතිය සමඟ මිලියන 28.8කට අධික වාර ගණනක් සන්නිවේදනය කර ඇති බව අනාවරණය වී ඇති බවත් සඳහන්.
මෙමඟින් ඔවුන් බලාපොරොත්තු වී ඇත්තේ Claude සතු ඉහළම තාක්ෂණික හැකියාවන් වන මෘදුකාංග ඉංජිනේරු ශිල්පීය ක්රම සහ තර්කන රටාවන් සොරකම් කර, තමන්ගේම චීන AI පද්ධති පුහුණු කිරීම සඳහා ඉතා අඩු පිරිවැයකින් භාවිත කිරීමයි.
මෙම ක්රියාවලිය හරහා ඇමරිකානු සමාගම් මිලියන ගණනක් වියදම් කර සිදුකරන පර්යේෂණවල ප්රතිඵල චීන සමාගම් විසින් ඉතා පහසුවෙන් පිටපත් කරගන්නා බව Anthropic සමාගම පවසනවා.
තවද මෙලෙස සොරකම් කරන ලද තාක්ෂණයන් ආශ්රයෙන් නිපදවන චීන AI පද්ධති තුළ මුල් පද්ධතියේ තිබූ ජාත්යන්තර ආරක්ෂණ රීති සහ සදාචාරාත්මක සීමාවන් අඩංගු නොවන බැවින් එය ගෝලීය ආරක්ෂාවටද දැඩි තර්ජනයක්.
මෙම සිදුවීමත් සමඟ ඇමරිකානු කොටස් වෙළෙඳපොළ තුළ Alibaba සමාගමේ කොටස් අගය සැලකිය යුතු ලෙස පහත වැටී ඇති අතර, ඇමරිකාව සහ චීනය අතර පවතින තාක්ෂණික යුද්ධය මෙයින් තවදුරටත් උණුසුම් වනු ඇතැයි ආර්ථික විචාරකයෝ විශ්වාස කරනවා.
