මෙරට සංචාරයක් සඳහා පැමිණි 25 හැවිරිදි ඇමරිකානු ජාතික තරුණියකට අතවර කර සංචාරක මඟ පෙන්වන්නෙකු සහ තවත් අයෙකු සැකපිට අත්අඩංගුවට ගෙන තිබෙනවා.
ඔවුන් මහනුවර පොලීසියේ අපරාධ විමර්ශන අංශය මඟින් අත්අඩංගුවට ගෙන ඇත්තේ, අතවරයට ලක්වූ බව කියන තරුණිය නානුඔය පොලීසියට ප්රකාශයක් කරමින් තමන්ට මහනුවර නවාතැන්පොළක දී පසුගිය 29 වනදා අතවරයක් සිදුවූ බවත් ඇයගේ ඇමරිකානු ඩොලර් 6000ක රන් අභරණ සොරාගත් බව කියන සිද්ධියක් සම්බන්ධයෙන් දැනුම්දීමෙන් අනතුරුවයි.
මහනුවර සිට බදුල්ල බලා පසු ගිය 30 වනදා දුම්රියෙන් ගමන් ගනිමින් සිට ඇති මෙම තරුණිය හඬමින් සිටිනු දුටු පිරිසක් ඒ පිළිබඳව විමසා ඇයව නානුඔය පොලීසියට යොමුකර තිබුණා.
ඇමරිකානු ඩොලර් 2400 ක් වටිනා රන් අත්පලදනාවක් ද ඩොලර් 3600 ක් වටිනා මාලයක් සහ දියමන්ති ඔබ්බවන ලද කරාබු දෙකක් ද තමන් අතවරයට ලක් කළ පුද්ගලයින් විසින් සොරාගෙන ඇති බවට ඇමරිකානු ජාතික තරුණිය පොලීසියට පැමිණිල්ලි කර තිබෙනවා.
පසුව මේ සම්බන්ධයෙන් විමර්ශන කළ මහනුවර පොලිසියේ අපරාධ අංශය සැකපිට අත්අඩංගුවට ගන්නා ලද පුද්ගලයින් දෙදෙනා අධිකරණ වෛද්යවරයා වෙත යොමුකර වාර්තාවක් ලබා ගැනීමට ද පියවර ගෙන තිබුණා.
පැමිණිල්ල කළ තරුණිය ද අධිකරණ වෛද්යවරයා වෙත යොමු කිරීමට උත්සාහ කළත් ඇය ඒ සඳහා ඉදිරිපත් වීම ප්රතික්ෂේප කර තිබෙනවා.
සංචාරක මඟ පෙන්වන්නා සහ තවත් අයෙකු සමඟ මහනුවර නවාතැන්පොළක දී මත්පැන් පානය කළ බවත් ඉන් පසුව තමන් අඩ නිරවතින් ඇදක් මත සිටි බවත් ප්රකාශ කර තිබෙන පැමිණිලිකාරිය ඒ අතර සිදුවූ කිසිවක් මතක නැති බව ද පොලීසියට පවසා ඇති බව සඳහන්.
