ජනාධිපති රනිල් වික්රමසිංහ ස්වාධීන අපේක්ෂකයෙකු ලෙස තරග කරන බවට දැනුම්දෙමින්, සිය පෞද්ගලික නීතිඥවරුන් මාර්ගයෙන් ජනාධිපතිවරණයට ඇප මුදල් තැන්පත් කළ ද, හෙතෙම කිසිදු අයුරකින් ජනපති ධුරයක වගකීම්වලින් නිදහස් වී නොමැති බව මැතිවරණ කොමිෂන් සභාවේ කොමසාරිස් ජනරාල් සමන් ශ්රී රත්නායක පවසනවා.
රාජගිරියේ පිහිටි මැතිවරණ මහලේකම් කාර්යාල පරිශ්රයේ දී අද (30) පැවති විශේෂ මාධ්ය හමුවකට එක්වෙමින් කොමසාරිස් ජනරාල්වරයා සඳහන් කළේ; ඉදිරි ජනාධිපතිවරණය පැවැත්වීමට අවශ්ය පසුබිම සැකසීමේ පූර්ණ විධායක බලය ජනාධිපතිවරයා සතුවන බවයි.
සමන් ශ්රී රත්නායක මහතා මෙලෙස සඳහන් කළේ හිස් ව ඇති පොලිස්පති ධුරය සම්බන්ධයෙන් අදහස් දක්වමින්.
කඩිනමින් පොලිස්පති ධුරයට සුදුස්සෙකු පත් කිරීම මේ මොහොතේ ජනාධිපතිවරයා සතු ප්රමුඛතම වගකීමක් බවත්; ඊට බලපෑම් කිරීම හෝ ලිපි ලිවීම අනවශ්ය බවත් මැතිවරණ කොමසාරි ජනරාල්වරයා සඳහන් කළා.
එම බලය ව්යවස්ථාවෙන් ම ජනාධිපතිවරයා හට පැවරී ඇති රාජකාරියක් බවයි හෙතෙම වැඩිදුරටත් පැවසුවේ.
කෙසේවෙතත් පොලිස්පති ගැටලුව සම්බන්ධයෙන් කඩිනම් විසඳුමක් දෙන ලෙසට දැනුම්දෙමින් ජනපතිට ලිඛිත ව දැනුම්දීමක් සිදු කිරීමට ද සිය කොමිසම බලාපොරොත්තුවෙන් සිටින බව ද සමන් ශ්රී රත්නායක මහතා කියා සිටියා.
මෙම සාකච්ඡාව ජනාධිපතිවරණය ප්රකාශයට පත් කිරීමෙන් අනතුරුව මැතිවරණ කොමිසම රැස් වූ පළමු අවස්ථාව ද වන අතර එහිදී ජනාධිපතිවරණය පැවැත්වීමට අදාළ කරුණු කිහිපයක් පිළිබඳව ද මෙහිදී අවධානය යොමු ව තිබෙනවා.
