ඩුබායි හි පැවැත්වෙන වයස අවුරුදු 19න් පහළ ආසියානු කුසලාන එක්දින ක්‍රිකට් තරගාවලියට සහභාගී වූ ශ්‍රී ලංකා කණ්ඩායම ඊයේ (14) යළි දිවයිනට පැමිණියා.
ක්‍රීඩකයින් සහ නිලධාරීන් 27 දෙනෙකුගෙන් සමන්විත එම කණ්ඩායම ඩුබායි සිට එමිරේට්ස් ගුවන් සේවයේ ඊ.කේ – 648 දරන ගුවන් යානයෙන් ඊයේ (14) රාත්‍රී 10.50ට පමණ කටුනායක ගුවන්තොටුපොළ වෙත පැමිණ තිබුණා.
වයස අවුරුදු 19න් පහළ ආසියානු කුසලාන එක්දින ක්‍රිකට් තරගාවලියට සහභාගී වූ ශ්‍රී ලංකා කණ්ඩායමට මූලික වටයේදීම මෙවර තරගාවලියෙන් ඉවත්වීමට සිදු වුණා.
ඒ මෙවර තරගාවලියේ ශ්‍රී ලංකා කණ්ඩායම මුහුණ දුන් එක්සත් අරාබි එමීර් රාජ්‍යය සහ බංග්ලාදේශය සමග පැවති තරගවල දී පරාජයට පත්වීමත් සමඟයි.
ශ්‍රී ලංකා වයස අවුරුදු 19න් පහළ කණ්ඩායමට මෙවර තරගාවලියේ දී ජයගැනීමට හැකි වුණේ ජපානය සමඟ පැවති තරගය පමණක්වීම විශේෂත්වයක්.
ඊයේ රාත්‍රියේ දිවයිනට පැමිණි වයස අවුරුදු 19න් පහළ කණ්ඩායමේ නායකයා මාධ්‍යවේදීන් තරගාවලිය සම්බන්ධයෙන් විමසූ විට සඳහන් කළේ ” අපි හිතාගෙන සිටිය දේ කරගැනීමට බැරිව ගියා ” යනුවෙන්.
මේ අතර කණ්ඩායමේ තවත් ක්‍රීඩකයින් කීපදෙනෙක් අද (15) දින රාත්‍රීයේ දී කටුනායක ගුවන් තොටුපොළ වෙත පැමිණීමට නියමිතව තිබෙනවා.
