එළඹෙන පළමු වනදා සිට ක්‍රියාත්මක බස් රථ රියදුරන්ට ආසන පටි පැළඳීමේ නීතියට තම සංගමය එකඟතාව පලකරන බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න පවසනවා.
මෙම වැඩපිළිවෙළට තමන් සහාය දැක්වුවත් ජූලි පළමුවනදා සිට මෙම නීතිය ක්‍රියාත්මක කිරීමට බස් රථ රියදුරන්ට ප්‍රායෝගිකව හැකියාවක් නොමැති බවයි සභාපතිවරයා සඳහන් කළේ.
පැරණි බස් රථවලට මෙම ආසන පටි පැමිණ නොමැති බවත් එම බස් රථවලට ඒවා සවි කර ගැනීමට කාලයක් අත්‍යාවශ්‍ය බවයි ඔහු වැඩිදුරටත් පැවසුවේ.
අද (29) පෙරවරුවේ මාධ්‍ය වෙත අදහස් දක්වමින් ඔහු මේ බව සඳහන් කළා.
ලංගම බස් රථ සඳහා නොමිලේ ආසන පටි සවි කරන්නේ නම්, පෞද්ගලික අංශයට ද සහනදායී වැඩපිළිවෙලක් යටතේ ආසන පටි ලබාදීමට රජයේ කටයුතු කළ යුතු බවයි සභාපතිවරයා මෙහිදී සඳහන් කර සිටියේ.
එමෙන්ම ඉන්දියාවෙන් ආනයනය කරනු ලබන බස් රටවල ආසන පටිය හරියාකාරව ක්‍රියාත්මක නොවන බවත් ඔහු මෙහිදී පැවසුවා.
බස් රථ රියදුන්රන්ට ආසන පටි පැළඳීමේ නීතිය අනිද්දා (01) සිට ක්‍රියාත්මක කරන බවයි ජාතික ගමනාගමන කොමිෂන සභාව දැනුම් දී ඇත්තේ.
