සමාජ මාධ්‍යය ඔස්සේ පසුගිය දා සංසරණය වූ කොළඹ ආර්.ප්‍රේමදාස ක්‍රීඩාංගණ පරිශ්‍රයේදී ඉන්ධන බවුසරයකින් බූලිවලට ඉන්ධන ලබා ගන්නා ආකාරය දැක්වෙන වීඩියෝව සම්බන්ධයෙන් ශ්‍රී ලංකා ක්‍රිකට් ආයතනය විසින් නිවේදනයක් නිකුත් කර තිබෙනවා.
ක්‍රිකට් ආයතනය විසින් ඉන්ධන අලෙවි කිරීමක් සිදුකරන බවට අදාළ වීඩියෝව මගින් චෝදනා එල්ල වී තිබුණා.
එහි දැක්වෙන පරිදි ශ්‍රී ලංකා ක්‍රිකට් ආයතනය කිසිදු ආකාරයකින් ඉන්ධන ගබඩා කිරීමේ නිරත නොවන බවත් ජනතාවට අලෙවි කිරීමක් සිදු නොකරන බවත් එම නිවේදනයෙන් පෙන්වා දී තිබෙනවා.
ලංකා IOC පිරවුම්හලකින් මිලදී ගත් ඉන්ධන තොගයක් ප්‍රේමදාස ක්‍රිකට් ක්‍රීඩාංගණ පරිශ්‍රයේ ගබඩා කර ඇති බවත් එම ඉන්ධන ශ්‍රී ලංකා ඕස්ට්‍රේලියා තරග සංචාරයේ අවශ්‍යතා සහ දේශීය ක්‍රිකට් මෙහෙයුම් සඳහා මෙන්ම ඉදිරි ජාත්‍යන්තර ක්‍රිකට් තරග සඳහා භාවිත කරන බවත් ක්‍රිකට් ආයතනය නිකුත් කළ නිවේදනයේ වැඩිදුරටත් සඳහන්.
ක්‍රිකට් ආයතනයේ බස් රථ, නිල වාහන, බිම් නඩත්තු යන්ත්‍ර සඳහා මෙම ඉන්ධන භාවිත කෙරෙන බව ද එමගින් පෙන්වා දී තිබෙනවා.
එමෙන්ම දිවා රාත්‍රී තරග සඳහා පහසුකම් සැලසීමට ජාත්‍යන්තර ක්‍රිකට් ක්‍රීඩාංගණවල පිහිටා ඇති විදුලිබල උත්පාදන යන්ත්‍ර සඳහා ද ඉන්ධන භාවිත කළ යුතු බවත් ක්‍රිකට් ආයතනය පෙන්වා දෙනවා.
ඒ අනුව ශ්‍රී ලංකා ක්‍රිකට් ආයතනය පවසන්නේ අදාල චෝදනාවල සහ කටකතාවල කිසිදු සත්‍යතාවයක් නොමැති බවයි.
