රුසියානු සමූහාණ්ඩුවේ නිල සංචාරයක නිරතව සිටින ශ්රී ලංකාවේ ආරක්ෂක ලේකම්, විශ්රාමික එයාර් වයිස් මාර්ෂල් සම්පත් තුයියකොන්තා පසුගියදා මොස්කව් නුවරදී රුසියානු නියෝජ්ය ආරක්ෂක අමාත්ය වාසිලි ඔස්මාකොව් හමුවුණා.
මොස්කව්හි දී මැයි 26 සිට 29 දක්වා පැවැත්වෙන පළමුවන ජාත්යන්තර ආරක්ෂක සංසදය සහ ආරක්ෂක ගැටළු පිළිබඳ ජ්යෙෂ්ඨ නියෝජිතයින්ගේ වාර්ෂික රැස්වීමට සමගාමීව මෙම හමුව සිදුව තිබෙනවා.
මෙම හමුවේදී දෙරට අතර කලාපීය සහ ගෝලීය වශයෙන් වැදගත් ආරක්ෂක අභියෝග පිළිබඳව අදහස් හුවමාරු කරගත් අතර, ශ්රී ලංකාව සහ රුසියානු සමූහාණ්ඩුව අතර අන්යොන්ය වශයෙන් වැදගත් වන ආරක්ෂක ක්ෂේත්රවල, විශේෂයෙන්ම යුධ-තාක්ෂණික සහයෝගීතාව, ධාරිතා සංවර්ධන වැඩසටහන් මෙන්ම දෙරට අතර පුහුණුවිම්වලට අදාළ අවස්ථා ඉහළ නැංවීම වෙනුවෙන් පවතින අඛණ්ඩ සහයෝගීතාවයේ වැදගත්කම තහවුරු කළා.
තවද, දැනට රුසියානු සමූහාණ්ඩුවේ සේවය කරන හිටපු ශ්රී ලාංකික හමුදා සාමාජිකයන්ට අදාළ කරුණු පිළිබඳවද දෙපාර්ශවය විසින්ම දීර්ඝ වශයෙන් සාකච්ඡා කර තිබෙනවා.
මෙම සාකච්ඡාව සඳහා රුසියාවේ ශ්රී ලංකා තානාපතිනි ශෝබිනී ගුණසේකර, ශ්රී ලංකා තානාපති කාර්යාලයේ චාන්සරි අංශයේ ප්රධානී මිහිරාවි දිසානායක සහ ආරක්ෂක උපදේශක එයාර් කොමදෝරු දිනේෂ් කසාගල යන අය සහභාගීව සිටියා.
