2022 වසරේ කොළඹ ගාලු පාරේ අහුන්ගල්ල ප්‍රසිද්ධ සංචාරක හෝටලයක් ඉදිරිපිට දී ත්‍රීරෝද රථ රියදුරෙකුට වෙඩි තැබීමට තැත් කිරීමේ සිද්ධියකට සම්බන්ධව අත්අඩංගුවට ගත් සැකකරුවකු පොලිස් විශේෂ කාර්ය බළකායේ නිලධාරීන් විසින් සඟවා ඇති ආයුධ පෙන්වීමට රැගෙන යනු ලැබූ අවස්ථාවේ දී සැකකරු විසින් විශේෂ කාර්ය බළකායේ නිලධාරීන්ට වෙඩි තැබීමට තැත්කිරීමේ දී නිලධාරීන්ගේ වෙඩි පහරින් එම පුද්ගලයා ජීවිතක්ෂයට පත්වීමේ සිද්ධියට සම්බන්ධව මියගිය අයගේ ඥාතීන් විසින් පොලිස් විශේෂ කාර්ය බලකායේ පොලිස් පරීක්ෂකවරයෙකුට එරෙහිව බලපිටිය මහේස්ත්‍රාත් අධිකරණයේ පවරා තිබූ නඩුවක් ඊයේ (10) විභාගයට ගනු ලැබුවා.
නීතිපතිවරයාගේ නිර්දේශ මත එම සිද්ධියට නඩු පැවරීම නොහැකි බව දැනුම්දීමෙන් අනතුරුව බලපිටිය මහේස්ත්‍රාත්වරයා විසින් මෙම නඩුව පවත්වාගෙන යාම ඊයේ (10) අවසන් කරනු ලැබුවා.
නීතිපතිවරයා විසින් දුන් උපදෙස් අනුව එයට එරෙහිව කටයුතු කිරීමට මහෙස්ත්‍රාත් අධිකරණයට බලතල නොමැති බැවින් එලෙස නඩු කටයුතු අවසන් කෙරුණු බවයි වාර්තා වන්නේ.
මෙම නඩුව පැවරූ මියගිය අයගේ බිරිඳට වින්දිතයන් රැක ගැනීම යටතේ පොලිස් ආරක්ෂාව සපයා තිබූ අතර ඇය පොලිස් ආරක්ෂාව මත අධිකරණ භූමියෙන් පිටව ගියා.
