“අස්වැසුම” සමාජ ආරක්ෂණ වැඩසටහනට සුදුසුකම් ලත් පිරිස තෝරාගැනීමේ දී යාවත්කාලීන වූ නිවැරදි දත්ත පද්ධතියක් පැවතීමේ අවශ්යතාවය ලෝක බැංකු නියෝජිතයින් අවධාරණය කරනවා.
ඒ, සඳහා වූ තාක්ෂණික සහ ජාත්යන්තර අත්දැකීම් ලබාදීමට සුදානම් බවයි ලෝක බැංකු නියෝජිතයින් ප්රකාශ කළේ.
“අස්වැසුම වැඩසටහන” පිළිබඳව මුදල්, ක්රම සම්පාදන සහ ආර්ථික සංවර්ධන කටයුතු පිළිබඳ අමාත්යාංශයීය උපදේශක කාරක සභාවේ සාමාජික මන්ත්රීවරුන්, ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ සාමාජික මන්ත්රීවරුන් ඇතුළු අනෙකුත් මන්ත්රීවරුන්, ලෝක බැංකු නියෝජිතයින් සහ මුදල්, ක්රම සම්පාදන සහ ආර්ථික සංවර්ධන අමාත්යාංශයේ නිලධාරීන් සමඟ පසුගියදා පාර්ලිමේන්තුවේදී ඒකාබද්ධව පැවැත්වූ රැස්වීමේ දී
මේ පිළිබඳ අදහස් පළ වුණා.
ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්ය උපාලි පන්නිලගේ සහ ආර්ථික සංවර්ධනය සහ අන්තර්ජාතික සබඳතා පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්රී නීතිඥ ලක්මාලි හේමචන්ද්රගේ ද සහභාගිත්වයෙන් පැවැත්වූ මෙම රැස්වීම සඳහා ලෝක බැංකුවේ සමාජ ආරක්ෂණ ව්යාපෘතිය ජ්යෙෂ්ඨ ආර්ථික විද්යාඥ ෆ්රැන්සෙස්කා ලමන්නා හා ජ්යෙෂ්ඨ සමාජ ආරක්ෂණ විශේෂඥ ශ්රීනිවාස් වරදන් ඇතුළු පිරිසක්ද සහභාගීව සිටියා.
මෙහිදී කරුණු දක්වමින් ලෝක බැංකු නියෝජිත පිරිස සමාජ ආරක්ෂණය සඳහා දත්ත පද්ධතියක් සකස් කිරීම ඔස්සේ සැබෑ ලෙසම දිළිඳු සහ අවදානම් මට්ටමේ සිටින පිරිස් හා පවුල් හඳුනාගත හැකි බව පැවැසුවා.
සමාජ ආරක්ෂණ දත්ත පද්ධතියකට පුරවැසියන්ගේ තොරතුරු ඇතුළත් කළ පමණින් ඔවුන් අස්වැසුම හෝ අදාළ වෙනත් ප්රතිලාභ ලබාගැනීමට සුදුසුකම් ලත් පිරිසක් නොවන බවත්, එම ඇතුළත් කර ඇති දත්ත පරික්ෂා කර බලා අදාළ ප්රතිලාභ අවශ්ය පිරිස් නිවැරදිව හඳුනාගැනීම සිදුකළ හැකි බව එම නියෝජිත පිරිස අදහස් දක්වමින් අවධාරණය කළා.
එමෙන්ම මෙම සමාජ ආරක්ෂණ පද්ධතිය රටකට ඵලදායී ආයෝජනයක් බවත් ඒ හේතුවෙන් එම දත්ත පද්ධතිය යාවත්කාලීන කිරීමේ අවශ්යතාවයද ඔවුහු තවදුරටත් අදහස් දක්වමින් අවධාරණය කර සිටියා.
මෙහිදී පාර්ලිමේන්තු මන්ත්රීවරයන් “අස්වැසුම” ප්රතිලාභ ලබාදීමේ දී මතුව ඇති ගැටලු පිළිබඳව අදහස් දැක්වූවා.
ඒ, අනුව අස්වැසුම ප්රතිලාභීන් ග්රාමීය කමිටුවක් මගින් තෝරා ගැනීමටත්, තෝරාගත් ප්රතිලාභීන්ගේ නම් අදාළ ග්රාමය තුළ ප්රදර්ශනය කිරීම තුළින් මෙහි පවතින විනිවිද භාවය තහවුරු කළ හැකි බව මන්ත්රීවරයන් අදහස් දක්වමින් පවසා සිටියා.
මෙහිදී අදහස් දක්වමින් ” අස්වැසුම ” ක්රියාත්මක කරන නිලධාරීන් ,ප්රාදේශීය ලේකම්වරුන් හා ග්රාම නිලධාරීන්වරුන්ට මෙම වැඩසටහන පිළිබඳව ප්රමාණවත් තොරතුරු නොලැබීම මත යම් බාධාවන් මතුව තිබු බවත් වර්තමානය වන විට ඔවුන්ගේ භූමිකව පිළිබඳව නිසි ලෙස දැනුවත් කරමින් වැඩසටහන සාර්ථක කරගැනීමට අවශ්ය සහාය ඔවුන්ගෙන් ලබාගන්නා බවත් පැවසුවා.
