නවගත්තේගම මහමැද්දෑව ග්‍රාමනිළධාරී වසමේ ගොවීන් පිරිසක් කුබුරු වැඩ සඳහා ගමන් කරමින් සිටි අවස්ථාවේ ගම්වැසියන් පසු පස වයස අවුරුදු 7 ක පමණ වන අලි පැටවෙකු ලුහුබැඳ පැමිණ තිබේ.
එම අවස්ථාවේ දී ගොවීන් විසින් මහමැද්දෑව නිවසක් වෙත දිව ගොස් ඇති අතර එහිදි ඔවුන් නිවස තුලට ගොස් ඇති අතර එහිදී කුලප්පු වී සිටි වන අලියා නිවසේ තිබූ භාණ්ඩවලට හානි සිදු කර ඇත.
පසුව ඒ මේ අත දිව ගිය අලි පැටවා නිවසේ ඉස්තෝප්පුව මත වැටී ඇත්තේ කුමක් හෝ කරුණක් නිසාවෙනි. වන අලි පැටවා නැගිටීමට උත්සහ දැරුවද එය ව්‍යර්ථ වූ හෙයින් නවගත්තේගම අඩවි වන නිළධාරි කාර්‍යාලය දැනුම්වත් කර ඇති අතර පසුව නවගත්තේගම අඩවි වන නිළධාරින් පැමින නිරීක්ෂණය කිරීමේදී අනාවරණය වී ඇත්තේ අලි පැටවා තෙහුට්ටු වී ඇති බවය.
පසුව වනජීවී පශුවෛද්‍ය නිළධාරි වෛද්‍ය ඉසුරු හේවාකෝට්ටගේ මහතා දැනුවත් කර වෛද්‍ය ප්‍රතිකාර ලබා දීමට නවගත්තේගම අඩවි ආරක්ශක සන්ජීව වීරසේකර , පශුවෛද්‍ය ඒකකයේ අඩවි සහකාර මන්ජුල අඩවි සහකාර ලලිත් යන මහත්වරුන් ඇතුලු නවගත්තේගම වනජීවී නිළධාරීන් කටයුතු සිදුකරන ලදි.
එහිදී වෛද්‍යවරයා විසින් සදහන් කලේ මුඛයෙහි වූ තුවාල හේතුවෙන් අලි පැටවාට ආහාර ගැනීමට නොහැකි වීම හේතුවෙන් ශරීරය දුර්වල වී ඇති බවය.පසුව නිළධාරින් විසින් වන අලියාට ප්‍රතිකාර කිරීම ආරම්භ කරන ලදි.වනජීවී නිළධාරින් විසින් මේ වන විටත් වන අලියාට ප්‍රතිකාර ලබා දෙමින් ඇත.
