සිංහල හා දෙමළ අලුත් අවුරුද්ද සහ දීර්ඝ නිවාඩු සමය හේතුවෙන් ලබන 17 වනදා දක්වා විශේෂ දුම්රිය ධාවනයට එක්කර ඇති බව දුම්රිය දෙපාර්තමේන්තුව පවසනවා.
සාමාන්‍ය දුර ගමන් දුම්රිය සේවාවන්ට අමතරව මෙම විශේෂ දුම්රිය ධාවනය කරන බවයි ගමනාගමන නියෝජ්‍ය සාමාන්‍යාධිකාරී ඉන්දික ඉඳිපොලගේ පැවසුවේ.
ඒ අනුව කොළඹ කොටුව – බදුල්ල, කොළඹ කොටුව – ගාල්ල, මරදාන – බෙලිඅත්ත, අනුරාධපුර – බෙලිඅත්ත අතර එම දුම්රිය ධාවනය කරන බවයි දුම්රිය දෙපාර්තමේන්තුව පැවසුවේ.
පෙරවරු 06.30 ට සහ රාත්‍රී 07.30 ට කොළඹ කොටුවේ සිට බදුල්ල දක්වා දුම්රිය දෙකක් 16 වනදා දක්වා ධාවනය කෙරෙනවා.
බදුල්ලෙන් කොළඹ කොටුව දක්වා දෛනිකව විශේෂ දුම්රිය දෙකක් ධාවනය කෙරෙන්නේ පෙරවරු 07ට සහ පස්වරු 05.20ටයි.
කොළඹ කොටුවේ සිට රාත්‍රී 07.20 ට ගාල්ල දක්වා දුම්රියක් ලබන 15 සහ 16 යන දෙදින ධාවනය කෙරෙනවා.
ගාල්ලේ සිට කොළඹ දක්වා පෙරවරු 06.10 ට ලබන 16 සහ 17 යන දෙදින විශේෂ දුම්රියක් ධාවනය කරන බවද දුම්රිය දෙපාර්තමේන්තුව සඳහන් කළා.
මරදානෙන් පෙරවරු 06.05 ට හෙට දිනයේ විශේෂ දුම්රියක් බෙලිඅත්ත බලා ධාවනය කෙරෙන අතර අනුරාධපුරයෙන් මධ්‍යහ්න 12.30 ට බෙලිඅත්ත බලා දුම්රියක් ධාවනය කෙරෙන්නේ ලබන 09 සහ 16 වන දෙදිනයි.
මේ අතර හෙට (06) පස්වරු 03.30 ට බෙලිඅත්තේ සිට මරදාන දක්වා විශේෂ දුම්රියක් ධාවනය කිරීමට නියමිතව තිබෙනවා.
ඊට අමතරව ලබන 08 වනදා සහ 15 වනදා පෙරවරු 07.30 ට බෙලිඅත්ත සිට අනුරාධපුරය දක්වා විශේෂ දුම්රියක් ධාවනය කරන බවයි දුම්රිය ගමනාගමන නියෝජ්‍ය සාමාන්‍යාධිකාරී ඉන්දික ඉඳිපොලගේ වැඩිදුරටත් පැවසුවේ.
