මහවැව නගරයට ආසන්නයෙන් ගලා බසින ඇළ මාර්ගය අසල සායනික අපද්‍රව්‍ය තොගයක් බැහැර කිරීමේ සිද්ධියක් සම්බන්ධයෙන් විමර්ශනයක් ආරම්භ කර තිබෙනවා.
තොඩුවාව පොලීසිය පැවසුවේ; දුර ගමන් යන ජනතාවට විවේක ගැනීම සඳහා මහවැව නගරයට ආසන්නයෙන් ස්ථානයක් නාත්තණ්ඩිය ප්‍රාදේශීය සභාව විසින් ස්ථාපනය කර ඇති අතර එම ස්ථානයට යාබද ව ඇති ඇළ මාර්ගයකට මෙම සායනික අපද්‍රව්‍ය බැහැර කර ඇති බවයි.
විශාල පෙට්ටි 04කට බහා මෙම සායනික අපද්‍රව්‍ය බැහැර කර තිබෙනවා.
භාවිතා කරන ලද එන්නත් කටු, සිලින්ජර් සහ හිස් ඖෂධ කුප්පි විශාල ප්‍රමාණයක් එම ස්ථානය තුළ ඇති ආකාරය දක්නට ලැබෙන බවයි අප ප්‍රාදේශීය වාර්තාකරු පැවසුවේ.
කවුරුන් විසින් මෙම සායනික අපද්‍රව්‍ය ගෙනවිත් බැහැර කෙරුවා ද යන්න මෙතෙක් අනාවරණය වී නැහැ.
හදිසි ජල ගැලීමක් ඇති වී මෙම එන්නත් කටු සහ අනෙකුත් දෑ ආසන්නයේ ඇති කුඹුරට එකතු වුණහොත්; විශාල හානියක් සිදුවීමට ඉඩ තිබූ බවයි ප්‍රදේශවාසීන් පැවසුවේ.
මෙම සායනික අපද්‍රව්‍ය තොගය නාත්තණ්ඩිය ප්‍රාදේශීය සභාවේ සහායෙන් ඉවත් කර විනාශ කර දැමීමට කටයුතු කරන බව තොඩුවාව පොලීසිය පැවසුවා.
