අවිධිමත් අංශයේ රැකියා නියුක්තිකයන් සේවක අර්ථසාධක අරමුදලට (EPF) දායක කරගැනීමට විදේශ රැකියා හා ශ්‍රමය පිළිබඳ ආංශික අධීක්ෂණ කාරක සභාවේ අවධානය යොමු ව තිබෙනවා.
ඒ විදේශ රැකියා හා ශ්‍රමය පිළිබඳ ආංශික අධීක්ෂණ කාරක සභාව පාර්ලිමේන්තු මන්ත්‍රී හෙක්ටර් අප්පුහාමිගේ ප්‍රධානත්වයෙන් පාර්ලිමේන්තු පරිශ්‍රයේ දී රැස්වුණු අවස්ථාවේදීයි.
ශ්‍රම වෙළෙඳපොළට අදාළ තොරතුරු එක්රැස් කිරීමට තොරතුරු පද්ධතියක් සකසන බව ද කම්කරු දෙපාර්තමේන්තුව කාරක සභාවට දන්වා තිබෙනවා.
අවිධිමත් අංශයේ රැකියා නියුක්තිකයන් සේවක අර්ථසාධක අරමුදලට (EPF) දායක කරගැනීම පිළිබඳ ව විදේශ රැකියා හා ශ්‍රමය පිළිබඳ ආංශික අධීක්ෂණ කාරක සභාවේ අවධානය යොමු වූ බවත්; සේවා අංශයේ අවිධිමත් අංශයේ රැකියාවන්වල නියුක්ත වූ පිරිස 60%ක් පමණ වන බවත්; එම පිරිස ද සේවක අර්ථ සාධක අරමුදලට දායක කරගැනීම මගින් ඔවුන්ගේ සමාජ ආරක්ෂණය ඉහළ නැංවිය හැකි බව ද කාරක සභාව
අවධාරණය කරනු ලැබුවා.
වර්තමානයේ සේවක අර්ථසාධක අරමුදල් ගෙවන ආයතන 80,000ක් පමණ කම්කරු දෙපාර්තමේන්තුවේ ලියාපදිංචි වී ඇති බව කාරක සභාවේ දී සාකච්ඡාවට බඳුන් ව තිබෙනවා.
ඒ අනුව එම සමාගම් ගණන ප්‍රමාණවත් නොවන බව පෙන්වා දුන් කාරක සභා සභාපතිවරයා සේවක අර්ථ
සාධක අරමුදල් ගෙවීම සඳහා ලියාපදිංචි නොවූ සමාගම් සියල්ල හඳුනාගැනීම සඳහා නිසි ක්‍රමවේදයක් සකස් කිරීමට කම්කරු දෙපාර්තමේන්තුවට උපදෙස් ලබාදුන් බවයි වාර්තා වන්නේ.
කම්කරු දෙපාර්තමේන්තුව ඩිජිටල්කරණයට ලක් කිරීමේ මූලික පියවර ගෙන ඇති බව කම්කරු දෙපාර්තමේන්තු නිලධාරීහු මෙහිදී ප්‍රකාශ කළා.
ජාතික ශ්‍රම වෙළෙඳපොළ තොරතුරු පද්ධතිය නමින් ශ්‍රම වෙළෙඳපොළට අදාළ තොරතුරු එක්රැස් කිරීමේ ඩිජිටල් ක්‍රමවේදයක් සැලසුම් කර ඇති බව ද කාරක සභාව හමුවේ වැඩිදුරටත් අදහස් දක්වමින් එම නිලධාරීන් ප්‍රකාශ කළ බවයි වාර්තා වන්නේ.
