අද (13) රාත්‍රියේ උදාවන සිංහල දෙමළ අලුත් අවුරුද්ද පිළිගැනීම වෙනුවෙන් මේ වනවිට ශ්‍රී ලාංකිකයින් ලහි ලහියේ සූදානම් වනවා.
මෙවර අලුත් අවුරුදු නැකැත් පත්‍රයට අනුව අලුත් අවුරුද්ද උදාවන්නේ අද (13) අපරභාග 09.05ටයි.
අද දින එනම් අප්‍රේල් මස 13 වන සෙනසුරාදා අපරභාග 02.41 සිට හෙට (14) දින අලුයම 03.29 දක්වා පුණ්‍ය කාලය යෙදී තිබෙනවා.
ඒ, අනුව අපරභාග 02.41ට පෙර ආහාර පාන ගෙන සියලු වැඩ අත්හැර ආගමික වතාවත්වල යෙදීම මැනවි බවයි මෙවර අලුත් අවුරුදු නැකැත් පත්‍රයේ දැක්වෙන්නේ.
මෙවර ආහාර පිසීමේ නැකත යෙදී ඇත්තේ අද දින එනම් අප්‍රේල් මස 13 වනදා රාත්‍රී 11.06ටයි.
නීල වර්ණ වස්ත්‍රාභරණයෙන් සැරසී දකුණු දිශාව බලා ලිප් බැඳ, ගිනි මොලවා, තල – උක් හකුරු මිශ්‍ර කිරිබතක් හා තල මිශ්‍ර කැවිලි වර්ගයක්ද පිළියෙල කර ගැනීම යහපත් බවයි ජ්‍යෝතිශ්‍යයේ සඳහන් වන්නේ.
වැඩ ඇල්ලීම, ගනු දෙනු කිරීම හා ආහාර අනුභවය අද (13) මධ්‍යම රාත්‍රී 12.06ට යෙදෙන සුබ නැකතින් නීල වර්ණ වස්ත්‍රාභරණයෙන් සැරසී දකුණු දිශාව බලා සිදුකළ යුතු බව මෙවර අවුරුදු නැකැත් පත්‍රයේ දැක්වෙනවා.
