අලි මිනිස් ගැටුම විසඳීමට ගත යුතු යෝජනා අඩංගු යෝජනාවලියක් පරිසර යුක්ති කේන්ද්‍රය විසින් ඊයේ (20)දින අභියාචනාධිකරණයට භාර දුන්නා.
දැවෙන ප්‍රශ්නයක් බවට පත් වී තිබෙන අලි මිනිස් ගැටුම විසඳීම සඳහා ජාතික වැඩපිළිවෙළක් සකස් කරන ලෙස වනජීවී අමාත්‍යවරයා, වනජීවී අධ්‍යක්ෂ ජෙනරාල් ඇතුළු පිරිසකට එරෙහිව ගොනු කළ පෙත්සමක් ඊයේ (20)දින අභියාචනාධිකරණය හමුවේ කැඳවනු ලැබූ අවස්ථාවේ දී පෙත්සම්කාර පරිසර යුක්ති කේන්ද්‍රය වෙනුවෙන් පෙනී සිටි නීතිඥ රවින්ද්‍රනාත් දාබරේ එම යෝජනාවලිය අධිකරණයට ඉදිරිපත් කළා.
ඉන් අනතුරුව පෙත්සම්කාර පාර්ශවයේ නීතිඥ රවින්ද්‍රනාත් දාබරේ අධිකරණය හමුවේ කරුණු දක්වමින් අලි මිනිස් ගැටුම පවතින ප්‍රදේශවල පදිංචිකරුවන් 15000 කට අධික පිරිසකගෙන් සහ එම ක්ෂේත්‍රය පිළිබඳව අවබෝධයක් තිබෙන බුද්ධිමතුන් ඇතුළු විද්වතුන්ගෙන් අදහස් ලබා ගැනීමෙන් අනතුරුව එම යෝජනාවලිය සකස් කර තිබෙන බව සඳහන් කර සිටියා.
ඉන් අනතුරුව මෙම යෝජනාවලිය අධ්‍යයනය කර සුදුසු වැඩපිළිවෙලක් සකස් කිරීම සඳහා එහි පිටපත් වග උත්තරකාර වනජීවී අමාත්‍යවරයා, වනජීවී අධ්‍යක්ෂ ජෙනරල්වරයා ඇතුළු වගඋත්තරකරුවන්ට ලබා දෙන ලෙසත් අධිකරණය විසින් නියෝග කරන ලදී.
ඉන් අනතුරුව මෙම පෙත්සම ලබන මාර්තු මස 26 වනදා කැඳවීමට නියම කළ අධිකරණය එදින මෙම යෝජනාවලිය පදනම් කරගෙන අලි මිනිස් ගැටුම නිරාකරණය කිරීම සඳහා සකස් කළ හැකි වැඩපිළිවෙළ සම්බන්ධයෙන් කරුණු දැක්වෙන ලෙසත් වග උත්තරකාර පාර්ශ්වයට නියෝග කරන ලදී.
