අල්ලස් ගත් පාස්පෝට් කන්තෝරුවේ ලිපිකරුවෙක් රිමාන්ඩ්

විදේශ ගමන් බලපත්‍රයක් ලබාදීම සඳහා පුද්ගලයෙකුගෙන් රුපියල් 6,000ක අල්ලසක් ලබා ගත්තේ යැයි සැකපිට අත්අඩංගුවට ගත් ආගමන හා විගමන දෙපාර්තමේන්තුවේ තැපැල් අංශයේ ලිපිකරුවෙකු ලබන 20 වනදා දක්වා රක්ෂිත බන්ධනාගාර ගත කරන ලෙස කොළඹ මහේස්ත්‍රාත් අද (13) අධිකරණය නියම කළා.

විදේශ ගමන් බලපත්‍රයක් කඩිනමින් ලබාදීම සඳහා රුපියල් 6,000ක අල්ලසක් ඉල්ලා එය ලබාගැනීමේ දී අල්ලස් කොමිසම විසින් මෙම සැකකරු අත්අඩංගුවට ගෙන තිබුණා.

අල්ලස් කොමිසව මගින් අත් අඩංගුවට ගත් මෙම සැකකරු අධිකරණයට ඉදිරිපත් කරමින් එහි නිලධාරීන් සඳහන් කළේ මෙම සැකකරුට අදාළ පරීක්ෂණ කටයුතු අවසන් වී නොමැති බැවින් ඔහු රක්ෂිත බන්දනාගාර ගත කරන ලෙස ඉල්ලා සිටින බවයි.

ඒ, අනුව අදාළ සැකකරු ලබන 20 වනදා දක්වා රක්ෂිත බන්ධනාගාර ගත කිරීමට නියම කෙරුණා.