ඌව පළාත් සභාවට අයත් ස්ථාවර තැන්පතු ගිණුම් 6ක් කල්පිරීමට පෙර ඉවත්කර රජයට රුපියල් ලක්ෂ 173ක පාඩු වීමේ සිද්ධිය සම්බන්ධව හිටපු ජනාධිපති රනිල් වික්රමසිංහ මහතා මාධ්ය හමුවේ සිදුකළ ප්රකාශය සම්පූර්ණ අසත්ය බැවින් මෙම සිද්ධියේ සැකකාර පාර්ලිමේන්තු මන්ත්රී චාමර සම්පත් දසනායකගේ ඇප අවලංගු කර ඔහු තවදුරටත් රක්ෂිත බන්ධනාගාරගත කරන ලෙසට අල්ලස් හෝ දූෂණ විමර්ශන කොමිසම කළ ඉල්ලීමක් කොළඹ ප්රධාන මහේස්ත්රාත් තනූජා ලක්මාලි මහත්මිය අද (16) ප්රතික්ෂේප කළා.
හිටපු ජනාධිපති රනිල් වික්රමසිංහ එම මාධ්ය හමුව චාමර සම්පත් දසනායකගේ බිරිඳ විසින් කරන ලද ඉල්ලීමකට අනුව සිදුකර ඇති බව ඔහු ඉකුත් අප්රේල් මස 28 වැනිදා අල්ලස් හෝ දූෂන විමර්ශන කොමිෂන් සභාවට ප්රකාශයක් ලබා දෙමින් පවසා සිටි බැවින් සැකකාර චාමර සම්පත් දසනායකගේ ඇප අවලංගු කර ඔහු යළි රක්ෂිත බන්ධනාගාරගත කරන ලෙසට අල්ලස් කොමිසමේ විමර්ශන නිලධාරීන් කළ ඉල්ලීමක් එසේ ප්රතික්ෂේප කෙරුණු බවයි දසත අධිකරණ වාර්තාකාරිණිය පැවසුවේ.
සැකකාර චාමර සම්පත් වෙනුවෙන් පෙනී සිටි ජනාධිපති නීතීඥ කාලිංග ඉන්දතිස්ස අධිකරණය හමුවේ කරුණු දක්වමින් කියා සිටියේ හිටපු ජනාධිපතිවරයාගේ ප්රකාශය සම්බන්ධයෙන් සැකකාර පාර්ශ්වයේ මැදිහත්වීමක් නොමැති බවත් ඒ පිළිබඳව අවධානය යොමු කර අල්ලස් කොමිසමේ විමර්ශන නිලධාරීන් කරන ලද ඉල්ලීම ප්රතික්ෂේප කරන ලෙසයි.
දෙපාර්ශ්වයේ දැක්වූ කරුණු සලකා බැලූ මහේස්ත්රාත්වරිය සැකකාර චාමර සම්පත් දසනායක තවදුරටත් රක්ෂිත බන්ධනාගාරගත කිරීමට තරම් අල්ලස් කොමිසම අධිකරණයට කරුණු ඉදිරිපත් කර නොමැති බව ද පෙන්වා දෙමින් එම කොමිසමේ ඉල්ලීම එසේ ප්රතික්ෂේප කළා.
