අල්ලස් හෝ දූෂණ චෝදනා විමර්ශන කොමිෂන් සභාවේ වර්තමාන අධ්‍යක්ෂ ජනරාල් රංග දිසානායකට එරෙහිව වහාම විනය පරීෂණයක් පවත්වන ලෙස මහාචාර්ය ජී.එල්. පීරිස් ප්‍රමුඛ ඒකාබද්ධ විපක්ෂයේ පිරිසක් පැමිණිල්ලක් ඉදිරිපත් කර තිබෙනවා.
එම කොමිෂන් සභාවේ සභාපති ඩබ්ලිව්. එම්.එන්.පී. ඉද්දවෙල වෙත ලිඛිතව මෙම පැමිණිල්ල ඉදිරිපත් කර ඇති අතර, එමඟින් දන්වා ඇත්තේ, අධ්‍යක්ෂ ජනරාල්වරයා කොමිෂන් සභාවේ නියෝග හා විධානයන්ට අනුකූලව කටයුතු කළ යුතු අතර, ඔහුගේ විනය බලධාරියා වන්නේ ද කොමිෂන් සභාවම බවයි.
අල්ලස් කොමිසමේ අධ්‍යක්ෂක ජනරාල්වරයාගේ ක්‍රියා කලාපය පිළිබඳව විශාල ගැටලුවක් පැන නැගී ඇති බවත්, ඔහු අත්තනෝමතික ලෙස පක්ෂග්‍රාහීව සිය රාජකාරී කටයුතු ඉටු කරන බවත් එම ලිපිය මඟින් දන්වා තිබෙනවා.
ඒ, අනුව ඔහුට එරෙහිව පියවර ගැනීමට කොමිෂන් සභාවට පූර්ණ බලතල ඇති බවයි ඒකාබද්ධ විපක්ෂයේ කණ්ඩායම එම ලිඛිත පැමිණිල්ල මඟින් දන්වා ඇත්තේ.
