මාස තුනක කාලයක් සඳහා ෆෙඩරල් වියදම්වලට අදාළ යෝජනාව අමෙරිකානු නියෝජිත මන්ත්රී මණ්ඩලය විසින් පරාජයට පත් කරනු ලැබීමෙන් පසු අමෙරිකානු ආණ්ඩුව තාවකාලික වසා දැමීමේ අර්බුදයකට ලක් ව තිබෙනවා.
ඊයේ (19) අදාළ යෝජනාව ඉදිරිපත් වුණා.
තේරී පත් වූ ජනාධිපති ඩොනල්ඩ් ට්රම්ප්ගේ මූලිකත්වයෙන් එය ඉදිරිපත් කළ අතර; ඔහුගේ රිපබ්ලිකන් පක්ෂය සහ ඩිමොක්රටික් පක්ෂය අතර ඒ සම්බන්ධයෙන් මූලික එකඟතාවක් ද පැවතුණා.
කෙසේ වුව ද; ඊයේ පැවති ඡන්ද විමසීමෙන් අදාළ යෝජනාව පරාජයට පත් ව තිබෙනවා.
යෝජනාව මගින් අමෙරිකානු ණය සීමාව වසර දෙකක් දක්වා අත්හිටුවීම, සහන සේවා සඳහා අමෙරිකානු ඩොලර් බිලියන 110ක අතිරේක මුදලක් වෙන් කිරීම ඇතුළු කරුණු ඉදිරිපත් කර තිබුණා.
සිකුරාදා දිනය (20) වන විට අමෙරිකානු ෆෙඩරල් වියදම් අවසන් වන අතර ඊට පෙර වෙනත් යෝජනාවක් සම්මත නොවුණහොත් අමෙරිකානු ආණ්ඩුවේ කටයුතු තාවකාලික ව අත්හිටුවීමට සිදු වනවා.
යම් හෙයකින් ෆෙඩරල් වියදම් ගෙවීමට නොහැකි වුවහොත් එරට අත්යවශ්ය නො වන සේවාවල සේවකයින්ට නිවාඩු ලබාදෙන අතර අත්යවශ්ය සේවකයින්ට සේවයේ නිරත විය හැකි නමුත් ඔවුන්ට වැටුප් ගෙවීම අදාළ කාලය තුළ සිදු නොවන බවයි වාර්තා වන්නේ.
මීට පෙර ද අමෙරිකානු ආණ්ඩුව තාවකාලික ව වසා දමා ඇති අතර 2018 -2019 වසරේ දී දින 35ක කාලයක් ආණ්ඩුවේ කටයුතු තාවකාලිකව අත්හිටුවා තිබුණා.
කෙසේ වුව ද මෙම අත්හිටුවීම මගින් සන්නද්ධ සේවා, හදිසි සේවා ඇතුළු අත්යවශ්ය සේවාවල බිඳ වැටීමක් සිදු නොවන බවයි වාර්තා වන්නේ.
