අම්බුළුවාව ප්‍රදේශයේ ඉදිකෙරෙන මෙරට ප්‍රථම කේබල් කාර් ව්‍යාපෘතියේ කටයුතු සඳහා කිසිදු බාධා කිරීමක් හෝ මැදිහත්වීමක් සිදු කිරීම වළක්වාලමින් අභියාචනාධිකරණය විසින් ගම්පොළ ප්‍රාදේශීය ලේකම්වරිය වෙත නිකුත් කර තිබු අතුරු තහනම් නියෝගය දෙසැම්බර් 02 වැනිදා දක්වා තවදුරටත් දීර්ඝ කිරීමට අභියාචනාධිකරණය නියෝග කර තිබෙනවා.
තම ව්‍යාපෘතියට බාධා එල්ල වන බව සඳහන් කරමින්, පෞද්ගලික සමාගමක් විසින් ගොනුකළ පෙත්සමක් සලකා බැලීමෙන් අනතුරුව අභියාචනාධිකරණය විසින් මෙම නියෝගය නිකුත් කළා.
මොහොමඩ් ලෆාර් තාහීර් සහ පී. කුමාර රත්නම් යන මහත්වරුන්ගේ සමන්විත අභියාචනාධිකරණ විනිසුරු මඩුල්ලක් හමුවේ මෙම පෙත්සම අද දින (29) සලකා බැලූ බව දසත අධිකරණ වාර්තාකරු පැවසුවා.
පෙත්සම්කාර සමාගම වෙනුවෙන් පෙනී සිටි ජනාධිපති නීතිඥ අලි සබ්රි මහතා අධිකරණය හමුවේ කරුණු දක්වමින් මෙම කේබල් කාර් ව්‍යාපෘතියේ ඉදිකිරීම් කටයුතු සඳහා සියලු රාජ්‍ය ආයතන අවශ්‍ය අනුමැතිය ලබා දී තිබියදී ගම්පොළ ප්‍රාදේශීය ලේකම්වරිය එම කටයුතුවලට බාධා සිදු කරන බවත් එම ප්‍රදේශය නාගරික සංවර්ධන අධිකාරියට අයත් බැවින් ඊට මැදිහත් වීමට ගමපොළ ප්‍රාදේශීය ලේකම්වරියට කිසිදු බලයක් නොමැති බවත් සඳහන් කළා.
එහිදි වගඋත්තරකාර පාර්ශ්වය වෙනුවෙන් පෙනී සිටින රජයේ නීතිඥවරිය මෙම පෙත්සමට අදාළ විරෝධතා ඉදිරිපත් කිරිමට වෙනත් දිනයක් ඉල්ලා සිටියා.
ඒ අනුව දෙසැම්බර් 02 වැනිදාට පෙර එම විරෝධතා ගොනු කරන ලෙස විනිසුරු මඩුල්ල නියෝග කළා.
මෙම පෙත්සමේ වග උත්තරකරුවන් ලෙස ගම්පොළ ප්‍රාදේශීය ලේකම් දිල්රුක්ෂි ජයරත්න, ශ්‍රී ලංකා සංචාරක මණ්ඩලය සහ ආයෝජන මණ්ඩලය ඇතුළු පිරිසක් නම් කර සිටිනවා.
