මඩකලපුව, භූ විද්‍යා සමීක්ෂණ හා පතල් කාර්යාංශයේ ප්‍රාදේශීය කාර්යාලයට ඇතුළු වී එහි රාජකාරියේ නියුතු රජයේ නිලධාරීන්ගේ රාජකාරියට බාධා කිරීමේ සිද්ධිය සම්බන්ධයෙන් අත්අඩංගුවට ගෙන රක්ෂිත බන්ධනාගාරගත කර සිටි පූජ්‍ය අම්පිටියේ සුමනරත්න හිමියන් දැඩි කොන්දේසි සහිතව ඇප මත මුදා හැරීමට මඩකලපුව මහේස්ත්‍රාත් අධිකරණය අද (11) නියෝග කළා.
ඒ අනුව රුපියල් ලක්ෂ දෙක බැගින් වූ ශරීර ඇප දෙකක් මත උන්වහන්සේ මෙලස ඇප මත මුදා හැර තිබෙනවා.
පසුගිය අගෝස්තු 31 වනදා මඩකලපුව, භූවිද්‍යා සමීක්ෂණ හා පතල් කාර්යාංශ කාර්යාලයට තවත් පුද්ගලයින් සිව්දෙනෙකු සමග ඇතුළු වූ සුමනරත්න හිමියන්, එහි සිටි රජයේ නිලධාරීන්ගේ රාජකාරියට බාධා කර තර්ජනය කළ බවට අදාළ රාජ්‍ය නිලධාරීන් විසින් මඩකලපුව මූලස්ථාන පොලිසියට පැමිණිල්ලක් කර තිබූ අතර, එම පැමිණිල්ලට අදාළව ප්‍රකාශයක් ලබා දීම සඳහා පසුගිය සඳුදා (07) මඩකලපුව පොලිස් ස්ථානයට පැමිණි අවස්ථාවේදී, මඩකලපුව මහා අපරාධ විමර්ශන අංශයේ නිලධාරින් විසින් උන්වහන්සේව අත්අඩංගුවට ගෙන අධිකරණයට ඉදිරිපත් කරනු ලැබුවා.
